雯雯「你問我答」霸氣親解鬧離婚仍造人張致恒否認性上癮被問偷食原因

更新時間：12:30 2023-10-21
發佈時間：12:30 2023-10-21

現年38歲的張致恒（Steven）與粉絲區燕雯（雯雯）2019年奉子成婚，雖然屢傳婚變，女方亦多次公開鬧老公又懶又廢，但二人仍四年抱四。由於一家六口開支甚大，最近兩公婆重施故技開設收費IG帳號，採取月費50元的會員制分享家庭事，惜開戶兩周僅吸40名粉絲，雯雯日前再宣布開設YouTube頻道「Uglymama 雯雯」，與老公合力賺奶粉錢！

【相關閱讀】：張致恒結紮過早錯失政府擬派2萬谷生育網民戥唔抵蝕8萬建議加追溯期

【點擊睇雯雯「你問我答」】：

經常呻窮的雯雯周一（16日）凌晨於IG Story緊急發文：「能夠最快賺到錢嘅工作，歡迎搵我」、「急需賺快錢，救命！」直到前晚（19日），她宣布開設YouTube頻道「Uglymama 雯雯」，並開Post讓網友隨便發問，而昨晚（20日）首條影片「深夜夫妻Q&A」終於上架。

片中，兩人並肩而坐回答網友的尖銳問題，雯雯全程盡展霸氣狂寸老公，搞到張致恒不時尷尬頭耷耷，完全唔畀面。張致恒率先被問有否治好性上癮？他即遊花園反問太太︰「性上癮醫好未呀？你覺得我醫好未？（雯雯：我點知呀）哈哈，你對住我你唔知？！」雯雯冷笑稱「唔知」，並催促對方回答問題，張致恒則謂：「我都唔性上癮，何來要醫呢？OK，下一條！」未料雯雯化身「記者」追問：「你唔係自己有性上癮咩？」張致恒瞪大眼表示從沒承認性上癮。

隨後再被問為何要偷食？張致恒再次詐傻：「係囉，點解要偷食呀？其實有好多人都偷食……」雯雯則不耐煩叫對方認真答：「而家係問緊你，唔係問緊人哋，你唔好Cut咗佢呀！」不過講完即掩嘴爆笑，擺明剝定花生等睇好戲，惜最終張致恒沒有正面回應。

【點擊睇張致恒夫婦婚變】：

當問到最初誰先追求對方？張致恒毫不猶豫答是被太太「溝」，結果秒速辣㷫雯雯：「你講多次？」張致恒見狀即笠水改口：「我追你先。」語畢一臉尷尬，惟雯雯被問及如何由粉絲升呢太太，她明顯十分避忌：「吓？！冇諗過喎，我冇諗過要一齊……」張致恒竟大膽反擊：「哦，所以有四個仔囉。」追問雙方如何認識？雯雯自言做了幾個月的Sun Boy'z粉絲，又突然爆料：「佢（張致恒）對Fans麻麻哋，所以我好快就走咗。」身旁的張致恒惟有無奈說：「係呀。」不過，雯雯表示最初因靚仔而愛上對方。

談到經濟狀況，二人坦言長期都沒錢，張致恒苦笑說：「講你聽都冇用，你又幫我唔到！大部份時間都係（戶口）唔夠一百，撳唔到出嚟，哈哈哈。」雯雯直言也有考慮返工，但謂：「我啱啱先生完，同埋邊個照顧小朋友呀？」此時，張致恒即出言護妻：「其實照顧小朋友係一件幾困難嘅事，我哋都有諗大家一齊出去做嘢，但而家狀況實在唔容許我哋請工人，所以我哋都好努力拚搏緊，希望可以請個工人，解決我哋嘅問題，同埋呢四年嚟佢都係處於懷孕狀態，嚟緊嘅日子編排會好啲。」

為何不滿對方仍不停造人？雯雯死撐：「係好不滿，咁一年裏面總有啲日子關係好少少，而家關係都唔好囉，你肯改咪好囉。」她坦承後悔嫁給對方，更謂日日都萌生離婚念頭，張致恒抱住BB說：「離婚……諗吓好喇。」雯雯黑面說：「咁就要睇你喇。」張致恒再次尷尬扯開話題：「睇你（BB）喇，知唔知呀。」