周海媚逝世丨黃日華憶「阿妹」昔日臉部常現紅斑 曾多次傳訊息無任何回覆
發佈時間：21:30 2023-12-13
周海媚前日（11日）離世，終年57歲。周海媚離世消息昨晚傳出後，死訊震撼中港台，不少圈中人亦紛紛悼念昔日合作過的好拍檔。曾與周海媚合作的黃日華、苗僑偉今日接受TVB《東張西望》訪問，痛憶昔日好拍檔。
【相關閱讀】：周海媚逝世丨重溫從影38年經典角色！ 周海媚憑《倚天屠龍記》獲封「最美周芷若」
【點擊睇黃日華講周海媚】：
與周海媚以兄妹相稱的黃日華在《東張西望》中表示，在前晚（11日）已經收到初步消息：「成日傳佢死咗，（心諗）唔好玩啦，唔係真嘅。我喺酒店都幫佢唸經，希望大步檻過，唔好係真。我哋坐高鐵返香港，喺高鐵一落車過關，我睇到心機都『吓！海味走咗』，係一個晴天霹靂嘅打擊。」
黃日華周海媚拍《義不容情》上契
黃日華昔日曾與周海媚合作《楊家將》、《義不容情》等劇視劇，黃日華憶述往事：「我初初第一次識佢係《楊家將》，啱啱選完港姐出嚟，係一個好乖、好單純、又唔出聲小妹妹。我哋成班人玩埋一齊，佢就坐埋一邊睇書，靜靜望住我哋，之後再拍《義不容情》，大家都熟咗好多，拍完之後公司同我哋搞咗個上契儀式，我哋三個成為三兄妹，所以我哋嗰時關係好好。海味嗰陣性格好開朗，個人好率直好真，佢演啲楚楚可憐角色又好入型又格；私下性格覺得係女嘅硬漢子，敢作敢為，係一個愛恨分明嘅人。」
黃日華提到後來周海媚再返香港拍電視劇，兩人曾經見面：「佢畀咗個電話號話我，話佢會成日換，之後我發好多訊息畀佢都冇覆，可能又改咗電話；同佢好多年都冇聯絡，但係冇啦……而家再無機會聽到佢把聲。」
【點擊睇周海媚講患「血小板偏低」】：
苗僑偉大讚為人隨和
苗僑偉2009年於《學警狙擊》與周海媚飾演一對戀人，苗僑偉憶述當時兩人合作：「我同海味識咗好耐，大家都係80年代出道，但我同佢真正合作係《學警狙擊》，嗰段時間相處比較耐，佢嗰陣係專程返香港同我拍，佢份人好nice，好隨和。雖然咁耐無返香港拍劇，但依然游刃有餘，合作得好開心，好可惜。」
黃日華曾問周海媚是否患紅斑狼瘡
苗僑偉又提到當時與周海媚合作期間，對方狀態好好：「冇話身體有咩唔舒服，剩係話佢有紅斑狼瘡，可能係免疫系統出事，我以為好小事，同佢拍嗰陣有冇唔舒服。」而黃日華亦提起周海媚身體情況，指拍《天地豪情》期間，經常見到對方臉部有紅斑：「佢欲言又止，似係唔想講咁detail畀我知，佢話『阿哥，冇嘢，我會搞掂，放心啦。嗰陣傳佢有紅斑狼瘡，我都有問過佢，佢話『冇事，阿哥，我會睇好自己』，嗰陣時開始擔心。」
【其他文章】：
周海媚逝世丨網瘋傳疑似病歷 上周呼吸困難需吸氧 送院意識喪失兼心跳停止
周海媚逝世丨「前夫」呂良偉56字哀悼舊愛：願你在另一個世界繼續歡笑
周海媚逝世丨任達華憶周海媚身體麻麻常有瘀傷 《大鬧廣昌隆》林家棟悼爽朗姐姐
周海媚逝世｜57歲周海媚仍單身 曾秘嫁呂良偉後閃電離婚 有過8段情史
周海媚逝世丨堅拒醫美「優雅地老去」獲激讚 崇尚順其自然：皺紋代表人生
周海媚逝世｜周海媚昨逝世為黎明57歲生日 兩人曾傳相戀同年同月生
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
