梁靖琪罕談首段婚姻失敗：係我太心急入行20年曾被金牌監製父親要求轉行

更新時間：21:00 2024-06-23
發佈時間：21:00 2024-06-23

現年41歲的梁靖琪Toby近日因《家族榮耀之繼承者》再度受到關注。近日梁靖琪接受商台《星光背後》主持人梁泰來訪問，，剖白無論當年以四人女子組合「女生宿舍」加入樂壇，又或是06年轉投TVB拍劇，由於父母梁家樹及蕭笑鳴當年均是電視台高層，她一直被標籤靠父蔭飽受網絡欺凌，同時亦罕談首段婚姻失敗。

梁靖琪父親是誰？

節目中，梁靖琪坦言20年來面對負評居多，甚少受到稱讚，今次在《家族榮耀之繼承者》演Nana，令她首獲觀眾認同外，更讓她哽咽的是，她於演員生涯中首次得到爸爸梁家樹認同：「我本來唔敢接呢個唔討好嘅角色，我本身形象已經唔討好，好驚畀人鬧！其實今次新劇出街頭嗰幾星期迴響都好差，因為觀眾未睇到角色變化同層次，所以直到重頭戲播之前，我都無上網睇評論，始終我而家做媽咪，唔想帶著負能量照顧小朋友。最後係爸爸第一個send有人讚我嘅評論畀我睇，仲加左『叻叻』手勢emoji，係人生一次，收到時好感動，諗起都想喊。」

梁靖琪首獲父親讚賞

談及當年不理父母勸阻入行，梁靖琪指父母早已告知她會因其背景面對不少壓力，至於「女生宿舍」兩年便解散，梁靖琪直認：「出咗一隻碟，銷量反應梗唔好！好難生存。」但她勢估不到2006年進入電視台拍劇，面對是非及難關更多：「一開始是非比當歌手時更多，因為性格問題，現在已經改咗好多㗎喇。我喺外國長大，同人打招呼會講『yo』『hey』，當時唔知太friendly原來會令人唔舒服。」

梁靖琪幸福家庭照：

及至2016年沒再為TVB拍劇，梁靖琪曾任健身教練、婚禮統籌及開設公關公司，她坦言是為生活，但某程度上也因為聽從父母的意見需另尋找別的發展，「之前拍劇拍到中段，畀人鬧到鬧埋父母，係好唔開心，覺得為乜呢？而家我有仔女就明白，最辛苦就係父母，點會有父母想聽到人地長期奚落自己啲仔女？如果有人長期奚落我兩個仔，我會好唔開心囉！所以我終於明白到點解佢哋中間叫我放棄拍劇，佢哋話：『你唔好做啦！搵過第二份工啦！點解你仲唔肯放手呢？』做極都唔討好，事實係當年我未拿捏到，根本無觀眾緣，咁咪從中去開婚紗公司，又試下搞飲食。」

梁靖琪：拍劇真係我夢想

至於近年又重投幕前拍劇？梁靖琪說：「好鍾意吖嘛，到呢刻我都好鍾意！真係我夢想，而家我終於同阿仔講，媽咪無放棄過自己夢想，如果你有夢想，都唔好輕易放棄。」

除了演戲滿途荊棘，梁靖琪亦經歷過兩段婚姻，重提首段婚姻失敗，梁靖琪說：「當時我太心急，我哋唔夠瞭解對方，之後先知大家要嘅嘢好唔一致，所以好快分開。」離婚後數年，梁靖琪透過朋友認識現任丈夫Jonathan：「係朋友介紹，第一眼就覺佢好靚仔。剛認識嗰陣，我搞緊一個慈善event，佢連續五日都嚟探我，兩個人坐係沙灘傾計飲咖啡，之後慢慢約會發現好夾，就一齊咗。」