吳若希夫婦「公審」事件逐件睇！曾火燒老公前度贈頸巾公開嘲對方無能：佢好鍾意俾我鬧！

更新時間：22:00 2024-07-09
發佈時間：22:00 2024-07-09

吳若希與老公何兆鴻結婚近7年，育有女兒Giselle與兒子「搏啜」。向來活躍社交網的吳若希，不時在社交平台「公審」丈夫「惡行」公開耍花槍，亦因此被網民封為「惡妻」。今日（9日）吳若希再在IG大爆老公「出軌」，不過，她以往多以嘲諷方式暗寸老公，今日卻字正嚴詞指，丈夫以「簽MPF文件」為名向公司女員工獻殷勤，懷疑丈夫出軌！其實吳若希結婚7年，已先後多次在社交網「公審」老公，內容包括掟爛嘢、燒頸巾、寸爆丈夫「無能」等。

相關閱讀︰吳若希爆老公殷勤接送女員工貼文公審：趷起條尾就知你做咩啦

吳若希何兆鴻結婚7年「公審」事件逐件睇：

吳若希寸老公吸煙唔用嘴唇交流

其實吳若希素有「惡妻」、「世界級港女」之稱，以另類方式御夫。今年1月，她到銅鑼灣宣傳新劇《旁觀者》，直認不讓丈夫親嘴：「我哋交流唔用嘴唇，我哋唔係錫而係用心靈交流。因為佢吸煙所以唔同佢用嘴唇交流，日後戒煙，我再用嘴唇獎勵佢！」

另外，何兆鴻在1月31日於IG寫道：「我生日，我老婆送咗兩本書給我……」自己38歲生日，撞正老婆開工，吳若希竟送兩本炮轟另一半的書籍《無能老公圖鑑》和《老公怎麼還不去死》作生日禮物。

吳若希怒燒老公前度送贈頸巾

再回帶到去年10月，吳若希在網台節目《絲打圍爐》上稱，試過因為老公沉迷打機而掟爛電腦，更加燒掉前度送他的頸巾：「佢去打機時，我發現咗有呢條頸巾，佢冇同我講有呢一位前度，又死口唔認，我咪放火燒咗佢條頸巾！」

吳若希稱，結婚初期，丈夫與閨密不避嫌而令她怒火中燒！「我老公會將我哋拍拖啲嘢同佢閨密share，又成日一齊飲酒，到我個女百日宴，我老公都有邀請佢閨密過嚟，閨密喎！閨密喎！閨密係烏『龜』定係喺屋企個『歸』呀？」續指︰「最介意呢啲EX，唔避嫌，又唔當住我面前出現？真係奇怪！」

同時自爆如何「懲罰」老公：「我好鍾意離家出走，我鍾意抱住個女離家出走，我會一聲不響咁走，呢樣先代表你真係嬲！平時好鎖碎嘅都直接鬧，鬧完就冇事，大件事就會直接走！我諗個女出世到而家，離家出走咗兩次！其實只要唔係佢死口唔認錯，就唔會有呢啲嘢發生。」

吳若希丈夫何兆鴻家底雄厚

其實吳若希丈夫何兆鴻一直被指家底雄厚，在澳門從事洋酒代理、創辦團購網，還入股某品牌眼鏡生意。吳若希自從簽約星夢娛樂後，跟胡鴻鈞、許廷鏗、周志文等人曾傳出緋聞。2016年7月上旬，爆出吳若希與澳門闊少何兆鴻挽手蜜遊泰國。至同月4日，女方索性在facebook放閃，上載情侶裝合照並留言：「何生，你幾時同我求婚？」第一次公開戀情。當時，二人不避嫌在IG放閃。戀情公開後不久，吳若希在同年9月19日於IG承認分手，一個月後復合。同年11月，吳若希懷孕三個月，並打算在女兒出生後結婚。

2017年全面停工安胎，4月誕下女兒。同年10月10日與何兆鴻簽字結婚。女方接受訪問時稱，10月10日有「十全十美」之意。2020年11月再誕下兒子。