東張西望丨已婚港婦疑墮網上情緣騙案！取走病母220萬再抵押住所：個計劃係7千萬歐羅
發佈時間：23:02 2024-07-10
TVB節目《東張西望》昨日報道一宗弟弟「李先生」貼街招向二家姐「阿Kate」追債的個案，指控二家姐擅自取走八旬母親「李婆婆」逾220萬積蓄的大半生積蓄，更將年邁患病的母親住所抵押給財務公司借250萬。今日《東張》繼續報道個案，弟弟公開與家姐的對話錄音，更懷疑家姐誤墮情騙陷阱！
相關閱讀：東張西望丨40歲智障女迷戀上司債務纏身 被哄騙提取強積金恐要離港：好鍾意佢，後生靚仔
港婦疑墮情騙取走母親畢生積蓄？
弟質疑家姐抵押聯名物業
弟弟李先生向《東張西望》披露與二家姐Kate的對話錄音，家姐表示：「我由頭到尾都問阿媽借，唔係呃佢錢。如果你咁講，我係咪以後唔還嗰300幾萬？唔緊要，你哋唔信咪唔信囉，我哋家事法庭見囉。」李先生反駁家姐指對方由始至終都想賴皮，又在對話中質問到家姐為何抵押媽媽住所：「點解財務公司可以借到畀你呢？呢度兩個名㗎嘛。」二家姐Kate卻說：「係啊，人哋肯借咪借囉，我都無辦法。」
錄音中Kate更透露不斷借錢，是為得到一筆更大財富：「因為要交稅，你知唔知佢收入幾多？個project係7,000萬歐羅（約5.91億港元），跟住意大利要佢畀3%稅，7千萬你計下3%有幾多？」李先生無奈說：「得啦，既然佢咁同你講，帶埋你去攞，我驚你去咗嗰度唔知點返嚟。」Kate回說：「如果我真係唔返嚟，假嘅話，晨早消失咗啦，係7,500萬嘅瑞士法郎（約6.51億港元）。」
相關閱讀：東張西望丨「女中醫」睇男士濕疹要除褲？召妓指南賣廣告：全球獨家精液顏色斷診
家姐與疑情騙騙徒相識逾40年
Kate與該意大利籍男子原來已經相識超過40年，該男子五年開始發動攻勢，向Kate要求鉅款，Kate疑似因而打媽媽主意。李生先亦在對話中質疑家姐：「現在你有冇接受過一分一毫？無吖嘛，攞唔到出嚟不特止，仲要加乜乜乜奉獻畀佢。」李先生續指家姐想賴皮：「頭先你話橫掂申請（家事法庭），我賴皮囉，唔還你咬我呀？你頭先講嘅說話就係咁嘅意思。」Kate竟然直說：「係啊！你估我借畀佢之前唔去查下？」李先生反問家姐如何調查，Kate回說：「佢有合約畀我睇，我查過係有船公司。」李先生反駁：「你落去睇住人做嘢，你去點算啦。」Kate大爆該意大利男子是做油田：「人哋係海上，喺油田度。」
李先生接受《東張》訪問期間，直指家姐Kate可能誤墮網上情緣騙案，透露家姐在1986年6月在澳洲留學期間，認識該意大利籍男子。李先生被問到家姐何時開始向該男子借錢，他透露在2019年已經知道：「佢話借我媽錢目的，係去畀呢個意大利人出糧畀工人。」李先生無奈說：「受騙係佢本人，但佢牽連到我哋幾個家庭。」
相關閱讀：東張西望丨港男因遺囑錯字失4千萬祖屋？繼母被封「何太2.0」對質反鬧：去搵你老竇啦！
家姐與姐夫如陌路人
李先生又透露原來二家姐Kate並非單身，兩夫妻雖然同住卻如同陌路人，被問到家姐是否缺乏關心而較易受騙，李先生也坦言：「絕對會啦，佢喺屋企除咗同個仔傾下偈，佢老公都唔理佢，唔同佢講嘢，我諗都係有關連。佢都講過，『我都要顧及自己下半生生活』，所謂下半生生活，既然有人畀一大𡁫錢我，我又只係付出少少，何樂而不為呢？但最後少少嘅錢，係幾百萬。」
李先生與《東張》一同上門找二家姐Kate對質，不過一直未有人應門，李先生打給二姐夫，不過對方態度好差。而兩人媽媽李婆婆近年身體情況已經日漸轉差，吞嚥困難加上腦退化，體型亦日漸消瘦，要已退休的李先生及工人姐姐貼身照顧。李先生亦透露要追數的原因：「每日阿媽都好失落，問我幾時幫佢拎錢，佢用台山話同我講，我feel到我媽對啲錢好緊張。」而大哥更直接鬧爆Kate：「佢個人對社會無幫助，係個行屍走肉嘅人。」至於被問到如果Kate還錢，會否原諒她，大哥表示：「可以。」
其他文章：
東張西望丨精液斷診「女中醫」被捕！黎寬怡被推撞上演追逐戰 驚恐表情逐格睇
東張西望丨男導師驚爆有「偷精」行為 被指性騷擾兼辱罵學員：話我係豬嘅性器官
東張西望丨深情中女為箍煲落情降疑受騙 訪問中途被爆做「小三」：你有冇落過小朋友？
東張西望丨八旬老翁沉迷按摩遭兩子斷絕關係 疑被34歲骨妹騙2百萬公開露骨訊息
東張西望丨近60歲人夫網上搵性伴侶睇中48歲飢渴離婚女 為「免費餐」失7萬元：衰鹹濕
