余慕蓮曾斥男星死要面借錢住私院 嫌疑人黎彼得認要人關照：多謝魚毛
發佈時間：19:00 2024-09-18
余慕蓮早前曾指有位男星債仔，她好心借錢給對方付醫藥費，最終很久才還清。而近日曾有「鬼馬填詞人」之稱的74歲黎彼得拍片就談到入院時曾獲余慕蓮關照，直認曾是余慕蓮「債仔」。黎彼得22年因「通波仔」後一直被「休息」，去年離巢TVB並進軍YouTube界，主持節目《玖噏秘笈》。日前一集中，黎彼得除了談到余慕蓮，更自爆被世侄鄭中基無視：「我衰極都叫一個小小嘅藝員，你冇理由當我隱形啩？佢真係眼尾都唔睄你。」
相關閱讀：《愛回家》前綠葉進軍YouTube大爆圈中秘聞 一度患病停工獲契仔黃宗澤接濟
黎彼得自爆被世侄鄭中基無視：
黎彼得與黃霑、盧國沾、鄭國江同屬香港第一代粵語流行曲填詞人，從70年代開始寫過不少經典廣東歌的歌詞，到了90年代，黎彼得進軍幕前演出過不少電視和電影，直到2022年因為入院「通波仔」後一直被「休息」，去年離巢TVB並宣布進軍YouTuber行列，經常在節目《玖噏秘笈》大爆娛樂圈鮮為一知的一面。在播出的新一集，黎彼得先多謝大家對他的支持，言談間突然提到鄭中基，黎彼得說：「有啲人叫我唔好成日講嚟講去都係講水面嗰啲，都要講吓水底，你知唔知水底嗰啲唔見得光，如果我搿硬去講，你哋就關仁啫，我隨時會再見返佢哋，咁點交代呢？啲人叫我講吓鄭中基，鄭中基我就唔會多謝佢，因為我同佢完全唔熟。」
黎彼得與鄭中基同𨋢被無視
黎彼得續說：「因為一次喺TVB，同埋一架𨋢，佢竟然無視我。喂，大佬，我衰極都叫一個小小嘅藝員，你冇理由當我隱形啩？佢真係可以眼尾都唔睄你。我話唔緊要啦，而家新一代係咁㗎啦！但係佢（鄭中基）唔明，我同佢爹哋鄭東漢，即係Norman鄭，原來曾經係朋友，好熟添。我哋197幾年識，佢幫過我忙，所以我喺度鳴謝佢。」
黎彼得與鄭東漢有偈傾
黎彼得坦言與鄭東漢本身有偈傾，又大讚對方好好人：「只不過會唔會縱壞個仔呢？呢啲我唔想再講。一陣啲人又話，之前話蕭若元個仔唔好，咁你個仔好叻咩？呢個好大問題，因為一家唔知一家事。鄭中基根本真係唔好嘅，你又酗酒，澩咁嫪，餐餐都出事。呢鑊仲大鑊，件事都淡出咗，算啦！我都唔想再提，唔係一陣間又話，你又踩人哋個仔，你個仔好叻咩？麻鬼煩，算啦，唔好提。」
余慕蓮交代後事、捐身家了心願：
後來黎彼得點名讚三位在他患病時雪中送炭的朋友，其中一個是余慕蓮：「大家都知道余慕蓮最近將啲遺產捐畀工業傷亡權益會和東華三院，係好值得尊敬嘅老人家，我點解會同余慕蓮結緣？佢同盧宛茵係我少數嘅女性朋友，嗰一輪我因肺積水喺浸會醫院留醫，余慕蓮間中買早餐探我，我覺得奇怪，同佢好少合作，點解會咁樣呢？我喺寶琳幫靚次伯搞咗間學校，余慕蓮想捐學校去貴州，想了解一下，驚畀人呃錢，嗰啲係辛苦錢，佢將喺TVB嘅公積金攞咗一半出嚟捐，好唔話得！佢想了解捐款手續。」
黎彼得感激余慕蓮雪中送炭
黎彼得稱二人因而成為好友：「跟住我哋都有去唱吓粵曲，呢個老人家好人到不得了，我對佢好尊敬，當年佢仲喺醫院同我找過數，嗰陣佢話你唔落得床，我幫你找咗先啦，醫院好得意，住到咁上下就要你找咗一筆先，驚住你走數，所以我要喺度多謝魚毛，咁要還㗎嘛，佢話：『你邊有咁大嚿錢呀，你不如分期還啦。』結果我分期還，還晒，要多謝佢。」不過余慕蓮曾爆有某個老牌藝人是她的債仔：「年前佢有病，但死要面住浸會醫院，我都係入政府醫院咋。每周醫院追數時，佢就發脾氣話『都出唔到院點找數呀？』最後我幫佢碌住卡先，結果佢分期3年，每月還2000蚊。」余慕蓮又爆對方寵壞了20歲的兒子，每次飲宴後都會將食物打包給兒子：「希望佢長命啲，佢死咗，個仔唔知點算好。」
黎彼得對劉鑾雄大恩不言謝
黎彼得又說：「仲有一個要多謝嘅就黃玉郎，八幾年，我因為肝炎入院，我嗰時喺玉龍集團做，佢幫我找數一半，嗰度都十幾廿萬，因為住養和醫院，當時我已經辭咗職，但係佢都同我找數，唔話得。」至於第三位是劉鑾雄：「不過因為佢唔想我提佢，唔想好似借住佢嚟宣傳，所以劉生嘅大恩不言謝喇！」
其他文章：
黎彼得話星爺唔係好人 笑李龍基:唔屙尿照下個樣 收埋大量圈中秘料 做YouTuber爆晒出嚟丨獨家
74歲黎彼得與「TVB御用惡奶奶」被捕獲狀態惹關注 兩人火氣猛現實大不同？
73歲黎彼得因病離開《愛回家》 罕有現身合體鍾志光面容身型惹關注
