羅家英談兩度患癌！胃痛檢查癌指數達500度 曾贈物業予汪明荃爆妻最怕X
發佈時間：09:00 2024-10-02
「汪阿姐」汪明荃日前為老公羅家英慶祝78歲生日，兩人在1988年因演出粵劇《穆桂英大戰洪州》相識繼而相戀，2009年結束愛情長跑，步入人生另一階段，至於已經相愛36年鶼鰈情深。日前羅家英罕有談及與太太汪明荃相處軼事，原來他們近年外出食飯實行AA制，言談間亦提到汪明荃曾考慮將財產捐贈到慈善機構，不過因為一個原因，未知會否出現變動。
相關閱讀：汪明荃提前慶祝羅家英78歲農曆生日 棄昔日最愛品牌改穿Valentino喜慶打扮顯細緻
羅家英罕談與汪明荃相處軼事：
羅家英在2004年時確診患上肝癌第3期，一度要割肝保命，當時汪明荃不離不棄陪伴抗癌，而且更四出訪尋名醫，曾有指汪明荃花費5位數字為羅家英調校中藥。羅家英日前接受好友汪曼玲的YouTube訪問，重提當年患病經過，羅家英說：「呢個係呢5、6年嘅事，好話唔好聽，我嗰陣係冇睇過中醫，全部都係睇西醫，但係都唔係睇得太多，嗰陣我只係切咗個腫瘤，之後只係食一粒肝藥，我到而家都食緊。」羅家英還說：「嗰陣連電療同化療都冇做過，我諗呢啲係命運。」
羅家英胃痛入院意外發現患癌
羅家英稱當時因為胃痛而入院，打完止痛針，15分鐘之後依然覺得痛，於是醫生建議入院檢查：「第二朝醫生話：『家英哥，你中咗。』醫生話驗血報告發現有癌症指數，普通人係4、5度，但係我有500度，佢叫我要做過磁力共振同搵多個醫生睇，最後發現我個肝有3cm大嘅腫瘤，係惡性，不過好彩腫瘤得一粒，仲係喺肝嘅邊，冇擴散，只係割咗就得。」完成手術後的三個月，羅家英再去做磁力共振：「我一路都係咁照住，每半年去做一次，監察注啲指數，點知去到2014年，喺左邊肝又發現一粒2cm大嘅腫瘤，又係喺邊邊，我喺舊年都發現有一粒，不過好細，用微創割咗佢。」
羅家英兩度患癌仍覺得很幸運
經歷過後，羅家英覺得很幸運：「嗰個醫生真係好好心，佢諗羅文又肝癌，我又係姓羅，不如幫我驗埋肝嘅癌症指數，本來唔會特別去驗，因為要畀錢，點知一驗就驗咗出嚟，如果唔係佢咁好心，我唔會知，而且三個月就會變雙倍，好快就晚期，容乜易死？如果咁唔好彩好似我咁有病，但係又好彩病到好似我咁好運，真係難得。」直到近年羅家英才開始服食中藥，他說：「因為阿姐都食緊中藥，所以佢帶埋我去睇，醫生打咗啲藥粉畀我食，一食要食三個月，要6萬蚊，我食到而家都食晒，我唔係日日食，只係得閒食吓，而家食咗差唔多2年，仲有一個月嘅份量。」
汪明荃羅家英情侶裝品牌逐件睇：
在訪問上，羅家英亦談到財產的分配問題，他說：「我未立平安紙，但係都有呢個諗法，諗住自己仲係好健康，但係個腦就有呢個安排。而佢呢？我唔知佢點安排，不過喺拍拖嘅時候係有講過，我唔會要你啲錢，你鍾意點用就點用，唔會『吼』住你啲錢，家用我會畀，其他嘢就係我自己，錢我有，係冇你咁多，但係我夠用。」羅家英還透露阿姐曾考慮將錢捐給慈善機構：「但係我話咁做唔啱，佢仲有個細佬，細佬有兩個仔，仔又會生仔，你姓汪，你得呢個細佬，係有後人，點解唔照顧啲後人？」
羅家英送近千萬單位給太太
雖然與汪明荃財政獨立，但原來羅家英三年前送了一間價值9百多萬的單位給太太並說：「我有能力嘛，咪買囉，我哋呢啲大男人，唔可以畀老婆管，所以咪各自各管自己，就算而家我哋出去食飯，都係AA制，一人一半錢。 近排我好鍾意出街食，但係佢唔可以去茶餐廳嘅地方，去親都大大間，每次要成千銀上落，餐餐都係我畀錢，咁都唔係辦法，咁不如一人一半喇，就算做人情都係一人一半。」不過作息方面則未有分房瞓，羅家英說：「我哋張床好大張，分咗兩張床褥，佢又有啲怕黑，多個人陪吓好啲。」
羅家英罕談與汪明荃的相處
羅家英其後再談與汪明荃的相處：「佢係強勢慣咗，有個男人容許佢咁強勢，不過慢慢有啲嘢都係我話事，好似係粵劇方面，如果係我做導演，我要控制場面，好多嘢要聽我，咁佢唱嘢唔係我嘅方式，所以我唔可以依照佢嘅方式教佢，要佢搵第二個人教，我係唔會教佢。」至於兩人相處又有否嗌交？羅家英則說：「我哋會因為我揸車，佢坐我隔離而嗌交，又唔畀我爬頭，要跟住車尾，其實點都係揸車嗰個做主，呢樣係磨擦最多，其他就唔理佢，不過我哋都係講理由嘅人，好似佢覺得應該兩公婆分工合作做家務，但係我一定唔會，跟住咪話男人係咁，佢諗諗又好似係，況且又有兩個工人，所以咪冇再叫我做。
其他文章：
77歲汪明荃由GUCCI狂迷變Hermès粉！戴近8千元「茄士咩」圍巾 闊太Look靚靚慶生
汪明荃為全紅嬋敢言發聲！深明名人都要付出代價望尊重私隱：做一個文化人
汪明荃炎夏穿羽絨包到冚！兩度患癌份外錫身 早前手術成功再活躍各大場合
汪明荃東莞開母親節音樂會粉絲坐滿121圍 熱情狂迷衝台邊舉燈牌歡呼
76歲汪明荃嬌俏孖辮妹Look與羅家英拍拖 再穿最愛GUCCI運動裝好慳家
