陳慧琳常喚兩子斟茶遞水被問：係咪有公主病 留定寶石俾愛子娶妻承諾盡量做easy奶奶
發佈時間：18:15 2024-10-20
陳慧琳（Kelly）今日到尖沙咀出席活動，Kelly在活動上跟小朋友玩遊戲之餘，大會為慶祝她明年入行30年，送上以她演唱會造型製造的熊仔朱古力。提到Kelly剛在玩遊戲是𠱁得小朋友很開心，身為兩子之母的Kelly笑指自己經驗多，又指現時兩個兒子𠱁自己較多，平常買花和跟她傾偈已好開心：「男仔唔多嘢講，（老公𠱁開心啲定仔𠱁開心啲？）個仔講一句就開心，老公要講多幾句。」她又自爆在家中經常會叫老公和兒子幫忙斟茶遞水，搞到兒子問她是否有公主病，她指兒子現在也會跟她講女仔，經她過目後也覺得她們的質素OK：「學校嗰啲都斯文同埋幾乖，不過佢一時一樣，成日轉來轉去，所以我都要靈活變通。」
問到她日後是否麻煩奶奶？Kelly笑指會盡量做easy奶奶：「如果個女仔蝦佢會出聲，不過呢啲醜人都係留返老公做。」Kelly指現實中與廣告一樣，爸爸也曾送她藍寶石，她指早已為兒子買保險，也為他們準備了「家當」：「自己本來有一隻鑽石婚戒，加埋爸爸隻藍寶石戒指，一人一份，結婚先俾佢哋，邊個結婚就邊個揀先。」
Kelly將於來年7月於紅館舉行30周年入行演唱會，又透露因舞台有機關，所以現時正在申請及構思中，提到上次在紅館開騷已是2015年，她笑指一講數字就驚，問到兩個兒子到時會否再上台？她謂不會，笑言要等個孫上台跳《花花宇宙》。
Kelly早前拍賣10個Hermès手袋，問到會否再買手袋？Kelly指因家中潮濕，要開冷氣保養手袋很麻煩：「又唔係日日拎住，而家嘅Lifestyle都轉咗小小，所以冷落佢哋，買其他嘢，我買啲細粒啲保值啲，例如鑽石同黃金。（轉買其他名牌物品？）撳住自己唔好再買，冇乜用，雖然都鍾意，但唔好太多，而家出街都casual。」另外，對於好友蔡一傑今日驚爆自己剛剛做完一個切除腦部腫瘤手術，Kelly指剛剛才知道，希望對方早日康復，快點養好身體再跳舞給大家看，而私下亦會慰問對方。
