著名電影人被爆電台開咪險被打揭29年前曾得罪陳百祥直踩商台要求「隻揪」

更新時間：12:48 2024-11-14
發佈時間：12:48 2024-11-14

資深電影人文雋在其YouTube頻道《文雋講呢啲講嗰啲》大談圈中人和事，近日一集邀黃子華做嘉賓，二人話題講到黑歴史，文雋突然被黃子華爆料，當年在商台開咪時，曾被陳百祥（阿叻）直踩商台要求隻揪，文雋在節目中將當時情況娓娓道來。

文雋寫專欄曾得罪陳百祥？

文雋對當年的事件大方公開，他指當年逢星期一晚跟林紀陶、已故林超榮講笑話，分享電影圈趣聞，同時又在報章寫專欄，其中一篇專欄提及陳百祥於1995年主持遊戲節目《運財至叻星》，大受觀眾歡迎，收視破紀錄外，又開拍同名賀歲片，當中的主題曲《我至叻》更是街知巷聞，甚推出唱片。文雋當時對《我至叻》登上勁歌金榜，有感而發。

陳百祥帶兩記者去商台

文雋表示：「我手多就寫咗句『如果呢個樂壇，連陳百祥嘅歌都可以上榜呢，咁我哋個樂壇……下刪500字。』當時佢睇到之後好嬲。」嘉賓黃子華即問：「下刪500字可以係讚美嘅字？」文雋續道：「當時係有個留白畀大家，而就喺我做節目期間，佢突然同秀姑（黃杏秀），帶埋一、兩個記者直闖直播室，我唔記得係開咪前定開完咪，就喺𨋢口相遇，佢就立即開口鬧，『文雋你做咩咁寫？』當時秀姑就同我講『叻哥，真係好嬲呀！佢好嬲呀！』」