機場三跑十公里賽丨周潤發孖唐詩詠冒雨出賽 大腿「乒乓波」腫塊有變化將預約醫生檢查
發佈時間：23:52 2024-11-17
赤臘角機場的第三跑道完工，今早（17日）舉行「三跑道系統十公里國際賽」，賽事有超過1萬人參與，吸引了熱愛跑步的影帝周潤發、唐詩詠、方力申、吳業坤、許家傑和商台DJ當奴等。周潤發接受《TVB娛樂新聞台》訪問時，透露目標跑一個全馬，「等到80歲先跑，10年時間，哈哈！」他又向傳媒表示大腿上的腫塊「乒乓波」已經變成「芝麻仔」，將會約醫生檢查。
相關閱讀：機場三跑十公里賽丨周潤發銀髮Skin head型爆現身 帶「視后徒弟」出戰 曾出手為愛徒按摩
周潤發笑指「乒乓波」已經變成「芝麻仔」：
69歲的周潤發在今早的機場三跑10公里，以1小時17分10秒完成賽事，他受訪時透露已吃了自製的烚雞蛋，望住飛機跑步很舒服，他表示：「天公造美，今朝落雨好犀利，而家一滴雨都冇，有風好舒服，我哋志在參與，唔係要時間。」周潤發又指跑得不快，地下跣也不會影響，他也希望可以跑全馬，「全馬仲未係時候，半馬可以勉強應付到，我而家跑咗一個半馬，等我跑多幾個（半馬）先，如果有咁嘅能力都希望跑一個全馬，等到80歲先跑，10年時間，哈哈！」
周潤發公開跑步路線，自揭不出埠一家在港跑步，「香港舒服同埋秋涼天氣好正，山又跑得、街又跑得，好多地方都撞到我，清宮、山頂呀！周圍都有嘅，我哋睇天氣啦！如果太曬，我哋通常喺樹林入面跑，冇咁曬好啲。」有傳媒問到周潤發大腿上呈乒乓波狀的腫塊，他表示「乒乓波」已經變成「芝麻仔」，明日會約醫生檢查。
周潤發生活貼地：
唐詩詠唔夠周潤發跑
身為周潤發徒弟的唐詩詠比師傅慢4分鐘完成10k，「冇諗成績所以滿意，不過當然想再好啲啦！一路跑一路望住啲飛機都開心，想練好個10k先，首先要跟到我哋個教練先，之後再慢慢努力，5k、6k仲見到發哥個背影，之後視線模糊喇！佢突然之間好快，我就慢慢欣賞風景。」唐詩詠透露現在一星期最少有兩天會跟周潤發跑步，比賽前試過一個星期都跑，她坦言周潤發練習時都幾嚴格，「今日你抖吓、今日同我跑幾多分鐘。」不過周潤發亦試過出手替唐詩詠按摩，「佢見我就嚟唔掂先出手，我哋都係收通告跑，因為要睇天氣會改時間，我頭先冇喘，去到6、7k時個身好熱。」周潤發更鬼馬唔認教唐詩詠跑步，「唔係教，一齊玩啫！佢好好㗎！佢跑咗咁耐，而家10k係一個好好成績，佢要練，佢啲氣比較弱啲，跑跑吓就好氣。」對於為跑友按摩，周潤發笑說：「佢哋有啲勞損咪同佢整下，整唔死咪算夠運。」
其他文章：
苗僑偉感激發哥似神仙打救教跑步 爆三嫂跑上癮腰骨痛都好番 直言已掛靴避談明星足球隊分家
周潤發犯下「男人都犯的錯」？ 同場女星拍片公開 預言激嬲發嫂要跪玻璃
CHANEL香港時裝show｜周潤發激罕戴畫家帽兼打呔拖發嫂出場 傳大腿有腫瘤：再大要入院
