蘋果花歌后楊燕移美逾40年 喪夫後過混沌生活 憶心臟科醫生老公拒求醫：三條血管塞晒
發佈時間：09:00 2024-12-09
台灣「蘋果花歌后」楊燕70年代紅遍港台，曾獲「香港十大歌星」殊榮，1979年她突然封嘴退出歌壇，與醫生男友閃婚，並移民美國生活。楊燕與老公結婚逾40年一直恩愛，育有一子一女，生活美滿。楊燕早前罕來港，即將迎80歲的她仍腰板直直，非常精靈，她接受資深傳媒人汪曼玲的YouTube節目訪問，談及近年經歷，透露3年前喪夫，一度陷於陰霾。
楊燕70年代閃婚移民美國
楊燕70年代紅極一時，直至31歲時，楊燕獲親友催婚，她指年輕時有很多男士追求，但不是不良嗜好多，就是已婚有老婆，她希望找未結過婚的單身男子，但因為一直忙於工作，沒有時間拍拖。後來她經台灣學妹介紹結識到一名美籍華裔醫生，楊燕到美國與對方見面，結識7個月只見吃過幾頓飯便註冊，楊燕坦言與老公是婚後才建立感情。楊燕在訪問中笑指，結婚過程非常倉卒，當時她在美國到處登台，「我當時喺三藩市，佢喺紐約，我仲未返台灣，佢話『你返嚟啦，我哋註冊』，佢話註冊，我即刻就話好。個神父問我係咪要嫁畀佢，我又唔識聽英文，我老公話『I do』，咁我就『I do』啦，佢朋友就話『恭喜你陳太』，我心諗，陳太？你同邊個講說話呀？我後尾先諗起我老公姓陳。」雖然結婚時大家並不夠了解，但婚後一拍即合，育有一子一女，過得非常幸福。
相關閱讀：「蘋果花歌后」楊燕優雅現身零老態 兒子耶魯大學畢業從醫女兒選美奪季軍
楊燕家庭照曝光？
楊燕醫生老公有病拒求醫
楊燕婚後仍間中到各地登台，老公更不時捧場，直至3年前楊燕老公身體出問題，入院後7日離世，楊燕開始要適應沒有老公的日子。楊燕分享老公出事經過，指老公雖然是心臟科醫生，卻一直忽視自己的病情，「最差嘅病人就係醫生，好多醫生成日以為，我都知點點點……唔使驗，所以我老公唔檢查。我叫佢抽血佢又唔抽，膝頭唔舒服，叫佢開刀睇吓都唔開，佢對眼又有白內障，都係唔開刀，我都開喇，佢都唔開！」直至82歲時，楊燕老公在家中後園跌倒，「佢跌親，嗌我，我喺屋內面，佢打電話畀我，佢話跌親，嚇到我死呀！我即刻出去，叫我扶佢起身，我扶唔到佢，我拎塊紙皮畀佢坐上去，我拉佢入嚟……冇辦法……佢話痛，我即刻叫911（報警），去咗醫院之後，醫生話佢臀骨斷咗，之後做全身檢查，佢三條血管塞晒，於是開刀。」
楊燕老公手術後仍掛心病人
楊燕老公手術後休養期間仍掛心病人，楊燕指當時她到醫院探老公，仍見到老公在病床上開藥給病人，「講到第三個病人嗰陣，佢隻手係咁震，跟住就反白眼望上面。」搶救40分鐘後，楊燕老公最終都病逝。楊燕指老伴離世令她陷入低谷，更一度連家門都不願出，「差唔多兩年嘅時間，我行唔到出嚟，無論咩人同你講都冇辦法，一定要靠自己。後來我諗……係囉，我有仔女又有孫，如果我一直混混沌沌，唔得！個女同我講咩都唔係幾清楚，好似食咗安眠藥咁，混混沌沌，好似飲醉酒咁。我未諗到呀（未接受到喪夫），但人哋話佢有福氣，七日就走咗。」
楊燕獲老公寵愛
楊燕指老公非常寵愛她，她到各地登台，老公都會陪伴在旁，早年送鑽石耳環給她，她因為大意遺失，老公竟沒有責怪她，更立即問是否需要買一對新耳環，自此她決定只戴假首飾。楊燕指喪夫後，幸好與子女同住獲照顧，有登台邀約被友人鼓勵可借唱歌走出陰霾，加上近年有三個孫陪伴，她已漸漸走出喪夫陰霾。
楊燕女兒是選美季軍？
楊燕103歲母兩年前險死：地下好多血
楊燕近年美國、台灣兩地走，楊燕透露最近胞妹身體出現問題，她不時要回台灣照顧媽媽及胞妹。楊燕指，媽媽已經103歲，兩年前曾徘徊死亡邊緣，她當時回台探望，因不想媽媽辛苦，簽下不搶救同意書，惟妹妹及弟弟都希望搶救媽媽。楊燕表示：「我見到我阿媽插晒管，好辛苦，地下好多血，睇到我心痛呀，如果要媽媽咁樣，唔好要佢受苦喇！」最終媽媽康復，現時腦袋仍很清醒，楊燕指爸爸離世時92歲，被汪曼玲指家族可能有長壽基因，估計楊燕最少有100歲，但楊燕有另一番看法：「人未必一定要長壽，最緊要開心同健康，如果真係喺醫院瞓一兩年，情願走，唔好痛苦呀……你自己痛苦、家人痛苦、朋友痛苦，浪費政府錢、浪費自己錢，冇必要。」楊燕指媽媽多年來都有運動習慣，惟肺部不太好，不時要抽痰，楊燕看到都感到痛苦，更指如果將來自己有同樣情況，希望家人不要救她。
