TVB頒獎典禮2024丨甄子丹任壓軸大獎頒獎嘉賓 發言激勵人心鼓勵後輩兼為視帝、視后爭取加薪獲全場掌聲
發佈時間：00:56 2025-01-20
TVB頒獎典禮2024／萬千星輝頒獎典禮2024／紅地氈｜香港電視廣播有限公司（TVB）一年一度的《萬千星輝頒獎典禮2024》昨晚（19日）在澳門上葡京綜合度假村圓滿結束。今年TVB頒獎典禮由國際武打巨星甄子丹擔任壓軸大獎「最佳劇集」的頒獎嘉賓。
萬千星輝頒獎典禮2024丨甄子丹擔任頒獎嘉賓
《萬千星輝頒獎典禮2024》今晚頒發多個獎項，而全晚的壓軸大獎「最佳劇集」剛由國際武打巨星甄子丹擔任頒獎嘉賓。甄子丹以一身全黑打扮型爆現身，登上頒獎禮舞台，即獲現場人士歡呼，非常受歡迎。甄子丹先向觀眾打招呼，並恭喜所有得獎者。
相關閱讀：TVB頒獎典禮2024｜《萬千星輝頒獎典禮2024》紅地氈陳自瑤低胸高衩晒腿氣勢勁 林夏薇透視惡鬥楊茜堯貼身裝
萬千星輝頒獎典禮2024丨甄子丹頒發最佳劇集：
甄子丹在頒獎前先向所有入圍及得獎者送上鼓勵，他說：「無論係獲獎、提名又好，我都要恭喜佢哋，因為佢哋每一個人都有好獨特嘅魅力，佢哋用咗好多時間去打造深入民心嘅角色。所以我要恭喜你哋全部人，你哋喺我心目中係好有實力嘅藝術家，我好期待（你哋）未來更精彩嘅作品。」
萬千星輝頒獎典禮2024丨甄子丹向女兒甄濟如送生日祝福
甄子丹續說：「今日係我個女嘅生日，21歲喇，時間過得好快。」台下即送上歡呼及掌聲，甄子丹向女兒甄濟如（Jasmine）送上祝賀：「Jasmine Happy Birthday！」甄子丹談到已有一段時間沒回TVB：「30幾年前我喺TVB拍過好多套劇，我完全可以體會到，作為一個Artist係需要幾多嘅努力，天賦同努力一定要啦，但係好緊要係劇本、團隊、機會、機遇，樣樣都唔可以缺。」
萬千星輝頒獎典禮2024丨甄子丹讚揚TVB：呢度係好多人嘅起點
其後甄子丹又指：「我要話畀你哋聽，你哋好優秀，如果有人同你講TVB做嘢咁辛苦，你可以大聲同佢哋講。你哋偶像周潤發、劉德華、梁朝偉、黃子華、周星馳，邊個唔係喺TVB嚟，邊個唔係TVB大家庭訓練出嚟。呢度係好多人嘅起點，亦都係我哋大家嘅情懷，童年回憶。」他又說：「睇劇集係唔會Out嘅，係唔會過時，好戲係一定有回響，好劇一定會有好報。」甄子丹最後更為一眾得獎者爭取福利說：「最後要補充一句，視帝、視后有冇加人工㗎？咁多位老闆，我代佢哋講，有冇加人工。」獲得現場不少掌聲。
甄子丹在騷後受訪時表示，賽果公平公正，演員付出好大努力，提名和得獎者都值得讚賞鼓勵。他指，自己三十幾年前拍過TVB劇，廿四小時沒休息，他笑言要幫視帝、視后說出心中話，爭取加人工，直言「得獎開心，加人工更開心」。被問到會否返TVB拍劇，他坦言「捱不到了」，但指以前的PA現時都已是大監，勾起不少起回憶。談到女兒甄濟如生日，甄子丹表示，在頒獎禮前跟女兒一起，之後由太太陪女兒，待頒完獎後再會合她們，亦會順道帶已21歲的女兒入賭場見識。對於流出在《誤判》拍攝期間的爆粗片段，甄子丹認為講粗口不代表無文化，粗口也是片場文化，表示自己沒針對任何人，片段沒有問題才出街。
