唱作女歌手驚爆患腦動脈瘤！出現劇烈頭痛緊急入院「拆彈」因一事寧願死都拒絕插喉
發佈時間：19:00 2025-02-20 HKT
在2008年由歌唱老師韋綺姍介紹入行的唱作歌手王若琪（Takki），入行不久因家庭經歷巨變，爸爸因癌病離世，媽媽因感冒導致肺炎，一度昏迷在入住ICU個多月，不過醒返後發現左腦中風，半身不遂連說話表達能力有問題，王若琪決定停工照顧病母。
王若琪曾受情緒病困擾離港生活
其後王若琪曾復出樂壇，但只作短暫停留後又消失於人前。原來當時王若琪受情緒病困擾，她選擇離港生活，神隱多時的王若琪，本月初突現身IG交代近況，驚爆因劇烈頭痛而發現腦動脈瘤，有機會餘生腦癱傷殘。
相關閱讀：母住老人院 王若琪2個月沒見面不開心
王若琪驚爆有腦動脈瘤
神隱多時的唱作歌手王若琪，在大S徐熙媛驚爆死訊當日，在IG貼上多張腦部的X光片並撰長文透露近況，她說：「本來諗住好返先同大家講，但係今朝起身睇到新聞，令到我有感而發想早啲同啲朋友講吓嘢，首先今朝睇到新聞真係有唔開心，亦都令我覺得能夠健康快樂咁樣生活喺呢個世界上面其實真係唔係必然，真係要珍惜所愛。」王若琪坦言近年「有好多原因令我呢幾年一直處於唔係好想見人嘅狀態」，但今次將會是在香港逗留最長的大段時間：「因為我腦血管出咗啲毛病，生咗一個腦動脈瘤，醫生同我講有啲人係唔使處理嘅，但係因為我係喺腦入邊，如果我唔處理嘅話，有一日佢爆破就會有生命危險，亦都講唔埋幾時會發生。其實我一直都15/16，做咗好多research究竟應唔應該去做呢一個手術，其實諗落我都好幸運，因為醫生話血管係冇痛覺嘅，所以基本上好多人係個瘤爆破咗之後先知道，嗰陣時已經係腦出血，三分之一嘅人會離開，三分之一嘅人會導致傷殘，另外嗰三分之一嘅人先至好幸運咁樣走返出嚟做返個正常人。」
王若琪因一次劇烈頭痛發現有瘤
王若琪還說：「我係因為一次劇烈嘅頭痛發現咗呢個病（但係醫生話呢個頭痛根本都唔關事，真係咁好彩發現到），所以我喺權衡過利弊之下，返咗嚟香港決定做呢個手術，要將一個支架放入去血管裏面，做完手術之後再食六至九個月嘅藥，慢慢等血管修復，等醫生放完假返工就安排手術嘅事宜。」她續說：「凡事都有兩面睇，我好感激我嘅身體好錫我，俾我一啲警告去等我知道我係時候處理一啲問題。雖然我都好驚，但係我覺得更大嘅感受係有一啲嘢，我以為自己放棄咗，但到咗呢一個時刻，我仍然好希望有機會再做返自己喜愛嘅演藝事業，所以我知道呢一樣嘢對我嚟講同生命一樣重要，亦都希望有更多嘅機會去表達自己，同埋分享自己嘅一啲經歷，同埋話俾大家聽，而家好多病都年輕化，希望大家唔好以為自己仲後生可以捱得到，一定要定期去check住，有咩事盡快去睇醫生唔好拖症。」
王若琪不希望攬住計時炸彈過一世
到了今日（20日），王若琪在IG報平安並宣布手術成功：「好多朋友以為我腦𥚃面有動脈瘤係要開腦同埋要鏟頭髮，其實係喺我嘅大髀開一刀，然後用一條道管穿過我的血管去到我腦嗰條患病嘅血管裏便，然後再喺嗰度做造影同埋釋放個支架出嚟。手術之前收到好多朋友嘅PM，有啲就話自己有病啦，有啲就話屋企人因為咁樣走咗，同我講好高風險㗎做都可能會死㗎或者會中風殘疾㗎，咁我首先同佢哋講我每個人嘅位置都唔一樣，如果我唔做我爆咗嘅話我可能直頭係冇命，連趕去要十字車喺屋企送我過醫院嘅時間都冇，大家話我好勇敢，其實我想講我都係冇得揀，所以我好積極咁面對，因為咁樣係唯一可以完全變返一個正常人嘅機會，我唔想攬住個計時炸彈過一世，講嘢大聲啲、行快啲、激動啲、拎重嘢都驚佢爆咁作為一個表演者樣，點可以每一刻都咁平靜呢？」
相關閱讀：57歲蔡一傑驚爆完成腦瘤切除手術 頭頂U型傷口照觸目驚心
蔡一傑完成腦瘤切除手術後首個生日：
王若琪寧願死都不想插喉
王若琪還感激遇上好醫生：「除咗技術好之外，佢好有醫德亦都好細心講解俾我哋聽面緊嘅處境，話俾我聽我呢個位置對我嘅生命有咩影響，做會點樣做？會有啲乜嘢好處同埋風險，唔做又會有啲嘢影響，在手術前一直在關心插喉的事情，原來正式做手術嘅全身麻醉係會冇咗自主呼吸一定要插喉，第一我唔想傷到個喉嚨；第二我睇過婆婆同埋媽媽喺ICU插咗好耐喉嗰種好辛苦，俾人綁住手腳郁都郁唔到嘅感覺，我媽咪連氣道造口都切埋，我曾經同我細佬講如果要我插喉我唔插㗎我寧願死㗎。」她又說：「後來麻醉師話聽咗吳醫生講因為我要唱歌所以盡量唔好傷到聲帶，掹返出嚟嗰陣時都好快所以冇乜感覺。我瞓咗上張床度，仲問麻醉師：『我會唔會喺中途醒返㗎？』佢話：『如果你中途醒返，我就冇得撈啦。』我係好驚嗰啲我自己又開唔到眼郁唔到其實我又醒咗好痛，但係冇人發現我醒咗嗰隻。」
王若琪康復的路相當漫長
最後王若琪說：「因為我覺得風險交俾佢哋啦，我知道風險係高㗎，一旦篤穿咗個瘤我就冇出血可能隨時都冇命，唔知呢，我好相信我一定會冇事嘅。接落嚟仲有六至九個月藥要食呀，因為血管入邊啱啱安裝咗個支架，防止啲血流到入去個動脈瘤裏便，但係因為呢個支架會令到本來條血管條釋放一啲一粒粒嘅嘢痴上個支架度，驚佢會堵塞晒成條血管，所以要食兩隻薄血藥，六個月之後睇吓個泡泡有冇縮返細，然後再持續觀察，一步一步慢慢康復。又有多一個經歷可以寫歌或者寫故事，真係好感恩 。」
