車禍毁容女星親解與前TVB御用奸人斷15年情真相：佢又冇求婚 澄清非偷食夜場俊男致分手
發佈時間：09:00 2025-02-23 HKT
寶佩如近日接受鍾慧冰YouTube節目訪問，談到過往情史及車禍毁容的辛酸。寶佩如在節目中主動提到初戀男友、前TVB御用奸人駱達華，親解當年二人拍拖15年卻分手收場的原因。
寶佩如與舊愛駱達華仍是好友
寶佩如透露當年入行全因想「監視」初戀男友駱達華，但拍拖15年，二人亦沒有意願結婚，強調最終是和平分手，至今仍是好朋友，更表示：「我同佢係再見亦是朋友，我同佢老婆都有偈傾。」
相關閱讀：寶珮如入行前竟做過呢個職業？ 自爆被反跟蹤兼爆粗恐嚇：生命有危險
寶珮如罕談與駱達華分手原因？
寶佩如對婚姻沒有憧憬
雖然現時寶佩如有段美滿婚姻，但早年的她因於破碎家庭成長，對婚姻沒有憧憬，提到媽媽獨力照顧她與胞弟時更一度想哭。寶佩如表示：「我爸爸……我哋3歲咋，佢就離開咗呢個屋企，我媽媽一個人打兩份工，當時我覺得……點解我個家庭咁唔完美？」寶佩如指由於媽媽擔心改嫁會令子女受委屈，因此寧願獨力照顧子女，亦因為童年的經歷，令她從未嚮往婚姻。寶佩如亦透露，當年與駱達華拍拖逾10年，早已失去激情，她表示：「又唔會有結婚嘅憧憬，佢又冇求婚之意。」更疑似有所暗示，她說：「佢（駱達華）份人好浪漫，佢啲粉絲畀信佢，佢真係會一字一句回覆，佢對我都浪漫嘅……加上可能對出面識嘅朋友可能都浪漫，講完喇！」
寶佩如赴台發展駱達華不曾探望
寶佩如當時獲圈中人引薦赴台發展，不過在當地逗留近一年，都只是上綜藝節目，後來得知台灣經理人想打造她成為性感女星，自覺不適合而決定放棄在當地發展。寶佩如表示當時仍未跟駱達華分手，「當時我同達仔又好似若即若離，咁我不如去另一個地方做嘢，大家感情會唔會好啲呢，當時我係咁諗。我就咁去咗（台灣），個衰佬呢……一次都冇嚟探過我。」
相關閱讀：寶珮如將踏入花甲之年好逆齡！現身為圈中人慶生 曾因車禍毀容兼盤骨碎裂七年間做多次手術
駱達華有個索爆高材生女兒：
寶佩如分手前結識到夜場俊男
寶佩如指由於在當地發展不理想，感情亦不順，令她更加思鄉，幸好在當地認識到一些朋友，而她的第二任男友正時於當地結識。寶佩如透露對方從事夜場工作，認識初期對方已有追求她之意，不過當時寶佩如仍未跟駱達華分手，因此沒有展開戀情。直至回港後，在台灣追求她的男子亦回到香港，二人繼續聯絡，卻令寶佩如更決心分手。寶佩如表示：「佢靚仔，我覺得好賞心悅目呀！佢好多甜言蜜語，好耐冇畀人𠱁啦嘛，女仔都鍾意人𠱁，達仔又唔𠱁我喇！唔知𠱁咗邊個喇！咁就覺得自己個心，好似去咗嗰邊少少，其實我個心已經花花哋去咗嗰邊。」最終寶佩如選擇與駱達華分手，才跟夜場俊男展開戀情，她強調：「我冇一腳踏兩船，係和平分手。」
寶佩如與第二任男友熱戀時期撞車
可惜熱戀半年便遇上車禍，而駕車者正是第二任男友，寶佩如表示：「呢個男友同佢拍拖6個月左右，係最唔開心，係一路都冇開心過，因為撞車好多手術，我做手術都做咗七年。其實我又冇埋怨佢，因為佢揸車嘅，而係意外邊個都唔想。」鍾慧冰追問，男方在夜場工作，與車禍是否有關，寶佩如指當時她等男友收工，又拿東西給友人，「可能個過程……可能佢又……飲咗酒啦。我唔知當時……佢又揸得好快，以前後生唔識驚。」最終卻發生嚴重車禍，男方只受輕傷，而她卻重傷毀了一生。
