試當真三子直播稱長期處於高壓狀態 游學修為昔日言行四度道歉：繼續慎言謹行
發佈時間：13:01 2025-04-05 HKT
由游學修、許賢同蘇致豪創作的團隊「試當真」在4月1日愚人節當日，無預警情況下突然宣布將於10月底、亦即成立5周年當日起停止運作，並強調「選擇在四月一日宣佈，也算是一種玩笑，但以下內容並非惡作劇」。創辦人游學修許賢蘇致豪昨晚在「試當真」的YouTube頻道拍片交代事件。
三人分別穿黑西裝再現身直播，游學修解釋停運原因不只一個，自開台這數年間，雖時間過得很快，但他完全沒時間停不下來，長期處於高壓狀態：「最主要原因是係我哋身心健康，真係有啲想改變」，所以決定五周年「好頭好尾結束」。
相關閱讀：「試當真」愚人節宣布10月停止更新 強調非惡作劇 蘇致豪：3個負責人有共識
試當真直播解釋停運原因：
游學修許賢蘇致豪稱團隊會留守到停運
游學修、許賢同蘇致豪稱提早宣佈停運是希望對支持的觀眾、同事有交代，而一眾「試當真」幕後團隊成員都會留守至10月停運，他們強調如對方想提早離開亦「非常OK」，更叫有興趣的公司「快啲撬」他們的同事，而且與旗下藝人亦有清晰的溝通，會以他們的利益為大前提。游學修說：「點解係4月1日，我就覺得因為如果某一天，即係3月31或者4月5號，突然有一天去講，我就覺得好似有一種太凝重、太突發，喺我心目中，4月1日係有一種緩衝嘅感覺，同埋又有一種試當真嘅玩味感覺。我哋都講明冇呃大家，係真話，所以我就覺得4月1日係幾好，未來半年我哋都會有好多製作。」蘇致豪反而持相反意見，他說：「我初初覺得唔係幾好，不過後來都覺得4月係好好，啱啱係半年。」
許賢再三強調停運是三人決定
蘇豪還說：「我噚日都有諗番講啲乜嘢，呢幾年好唔容易，有好多變動，去到Channel停運，我哋先會有『從容』一刻。」許賢則說：「我哋仍在生，仲呼吸緊，團隊係一個概念，我哋每一個都係有血有肉嘅人，我哋係咪幸福，做得辛唔辛苦都好重要，可能有其他形式出現都唔定，起碼我哋仲在生。」他們再三強調停運是三人決定：「我哋兩個都係成年人，31、32 歲，到今時今日希望大家入埋我哋數，大家有不滿，三個都鬧，唔好剩係鬧阿修。」
游學修準備了一番說話回應hater
游學修亦準備了一番說話回應hater，他說：「喺呢件事見到有好多負面嘅聲音，批評嘅說話，既然都完喇，我都想同所有討厭我嘅人，以至討厭『試當真』嘅觀眾講一聲，我係知道自己以前嘅表達方式唔係咁好，我想為呢樣嘢同大家say個sorry，我近來覺呢啲係我自己作嘅孽，令『試當真』同我嘅團隊長期承受好多負面嘅說話同聲音，我想同大家say個sorry。我之前闖過好多禍，有好多公關災難，講過話會慎言謹行，我自問喺呢大半年入面，都過到自己嗰關，我覺得自己真係成長咗，我都想向唔喜歡我嘅朋友say個sorry，我保證喺末來嘅日子，會繼續做好自己，會畀大家睇，我真係會改善到呢樣嘢，希望大家可以繼續支持其他你哋想支持嘅嘢，我鄭重同大家say個sorry，希望大家明白我嘅心意，對唔住。」
游學修稱「試當真」目前財政狀態還好
至於「試當真」目前財政狀態，游學修稱還好，不過未來不是太有信心：「下年難講，再下年再難講。」之後還會有作品推出，包括至少兩集「試玩毛」「太空人」及「墨魚遊戲2」。亦可能會拍「Channel需要執」及「寫實的天能」作首尾呼應，電影《小朋友齊打交》則會繼續開拍，但進度要視乎電影公司安排，劇本已經寫好。游學修表示停運之後自己要放假：「我想帶屋企人去旅行，真係十幾廿年無做過呢件事，細個老竇老母帶去旅行，我就未帶過佢哋。呢幾年無停過呀，我想生活下。」
