TVB一線小生爆為搵食曾接全裸工作 嘆近5年曝光近零 富貴老婆屢撳火爆性格：我咩都化晒
發佈時間：10:00 2025-04-12 HKT
43歲袁偉豪2020年迎娶細10年張寶兒，去年11月二人榮升父母，兒子「袁咕碌」袁晞祐（Hayven）已經1歲大。因張寶兒出身大富之家，袁偉豪被認為身價幾級跳，故近年一直被網民封為「億萬駙馬」。昨日（11日），袁偉豪接受資深電視劇製作人楊紹鴻的YouTube頻道專訪，自爆曾為搵食接下全裸工作，更慨嘆自己有近五年時間曝光度近零。
袁偉豪爆為搵食曾接全裸工作
昨日（11日），袁偉豪接受資深電視劇製作人楊紹鴻的YouTube 頻道專訪，被問到為何會拍攝大尺度人體寫真時，他表示：「嗰時我25歲，做一啲幕後工作，得閒就搵下啲part time，咁啱就係網上應徵model，就有一啲畫家定期做啲人體素描，問我有冇興趣，我話都可以試下嘅，其實我都有少少卻步，不過當時拍拖嘅朋友仔呢，佢嘅性格比較洋化，就鼓勵我去嘗試，咁我又覺得人生係要做啲多啲經驗，所以就膽粗粗走去試，就做咗一次人體素描模特兒。（有冇覺得尷尬？）一定有，7、8個artist圍住，我一入去放低個背囊就開始除衫，去到嗰個位已經返唔到轉頭，咁咪試下囉！咁都有咕𠱸遮下啲重要部位嘅，但畫咗5分鐘之後我覺得對佢地唔係太尊重，所以我就放開放鬆，隨便畫囉！」
相關閱讀：43歲袁偉豪海量童年照曝光！五官複製媽媽 見證強大基因四代如餅印
袁偉豪接受楊紹鴻專訪：
袁偉豪富貴老婆屢撳火爆性格
當被問到為何性格火爆時，袁偉豪表示：「屈得耐囉！其實係一個階段嚟，對自己工作有要求，或者自己嘅觀點同外邊畀我嘅對比太大，或者我自己嘅睇法同個世界背道而馳，就會有一種咁樣嘅回應囉，我覺得唔係真火爆，而係谷咗好耐。嗰陣會覺得點解自己辛苦工作咁多年，點解傳媒係唔會理你㗎喎，只會講八卦新聞，我唔明呢行係點玩。（依家化未啊？）依家梗係化啦，結咗婚啦！結咗婚你地隨便講啦，合法夫妻都冇乜所謂。（依家唔會咁輕易去動怒？）唔會，但可能會有微言，個種微言係慨嘆啦，太太有勸過我好多嘅。」
相關閱讀：TVB小生晒7千萬豪宅花園如私人遊樂場 仲有機動遊戲？親自組裝因一事怨老婆
袁偉豪張寶兒豪宅內貌逐格睇：
袁偉豪嘆近5年曝光近零
最後被問到近年曝光度減少，袁偉豪表示：「呢個係公司安排啦，冇辦法，我條命係咁樣，以前我好多嘢做，因為我拼搏，去到公司想擺我去另一個位置，我又跟住去做。但係去到公司轉高層、轉格局嘅時間，我又冇咗個班人搵我做嘢，重新要再去建立，同埋呢7、8年呢，差唔多都有5年㗎啦！我呢5、6年我係好少係電視出現，因為由本地公司製作，開始去到同內地合拍，嗰個交界裡邊，一年開一兩套，或者係兩年先拍一套，咁大家咪少咗見我囉！（有冇諗過去點keep住知名度？）我地係社交平台上post嘅嘢大家都會見到，傳媒都會係嗰到攞話題，至於你話新人，我係比較會分享一啲經驗畀佢地，希望佢地行少啲冤枉路。」
