日本7月大地震？有港人寧改行程去越南 有人毋懼照出發：唔信堪輿學家
發佈時間：07:00 2025-03-05 HKT
【日本地震/南海海槽/天文台/我所看見的未來/海嘯/日本旅行團】不論淡季旺季，一向有大量港人赴日本旅遊，據日本政府觀光局最新數字，2024年全年訪日港人達268萬人次，創歷史新高。不過，近期日本官方機構的地震海嘯專家，多次就南海海槽發生地震的潛在風險發警示，料未來30年內發生8至9級地震的概率增至「75%至82%」。更有傳言聲稱，特大地震將在今年7月5日發生；也有堪輿學家呼籲7至8月勿到日本旅遊，外號「七師傅」甚至稱「4月後就唔好去日本」。
市民改去歐洲：一時不去日本無損失
傳言滿天飛，會否動搖港人「返鄉下」的決心呢？《星島頭條》記者日前到銅鑼灣一帶的旅行社，發現仍有不少人照舊報日本團，但亦有不少客人感擔心，表明不會在暑期期間遊日；亦有市民不太理會堪輿學家的言論，如常出發。
市民張女士表示，已和家人有共識，不會在今年7至8月前往日本旅行，自己的朋友也是如此。她稱會改去歐洲旅行，「睇咗報紙個個都咁講（日本地震），寧可信其有」，認為一時不去也不會有損失，反正每個季節都有不同景色。
原定3月遊日 梁生一家轉飛越南
梁生一家原定3月會去日本，但由於有傳言指發生特大地震，加上流感肆虐，因此決定取消計劃，轉至越南富國島。梁生指未來仍想去日本，會避開「大家都會驚嘅嗰段時間」。
至於遠離地震帶的縣，梁生認為一旦其他地方發生地震，即使無直接災害，交通等方面也會受影響，尤其有小朋友或老人家就更難處理。
夫婦照去唔驚 反而擔心流感
康生康太則未有太擔心，預計4月復活節假會按原定計劃，如期去日本關西旅行一星期，認為除非是日本官方「講到明7月會地震」，否則「堪輿學家講嗰啲，我哋就無乜點去理」。康生表示，日本一向有地震，反而更擔心流感，因此會全程佩戴口罩。
市民馮生：香港人咁鍾意日本 願承擔風險
馮先生指聽說過有關預言，會盡量避免今年夏天赴日，但認為即使有風險，也改變不了港人愛去日本的習慣，「香港人咁鍾意，都願意承擔呢啲風險」。他稱會報名越南團，暫未有計劃前往其他地震高危地方，例如台灣、土耳其等。
記者：陳俊豪
相關新聞：
日本大地震傳言嚇窒港人！旅行社查詢減 客人轉戰中東歐洲 有客趕尾班車4月赴日
日本頻傳7月大地震 中大地理專家拆解南海海槽地震機率 即睇日本高危地區
日本地震｜南海海槽地震概率升至82% 海嘯6小時抵港 天文台指受4因素影響
