大跌市下要做的事｜唐牛
發佈時間：09:15 2025-04-07 HKT
香港股民過了一個唔安樂嘅清明假期，無他，特朗普出招下，美股連日大跌，預示恒指今日將低開逾千點，股票倉位又準備放血。不過，投資（投機）乃長途賽，如何在逆市下打好守勢波，才是贏得冠軍嘅關鍵。
大跌市下要做的事：
‧留意今年倉位表現，先行沽出短炒股票
‧如盈利跌至警戒線，應向核心持倉埋手
‧一刀切減倉，如每隻股份減持20%
‧最終目標增加現金水平，減慢流血速度
本欄不止一次提到執倉、動態trading的重要性，若有落實執行，今次傷勢已經比其他人輕。事實上，個股走勢大部份已走樣，用圖表決定去或留，基本上可以清倉，所以，在大是大非的市況，我通常都係睇住大數做人——即今年倉位表現。
以我自己為例，幸運地還有些少利潤在手（過埋今日唔知），一貫做法，先行沽出短炒的股票。因為短炒多因氣氛好而買入，而家氣氛轉差，呢類股票入市的誘因已不存在，加上輸錢機會較大（因為通常高追），合埋眼斬。
假設市況跌跌不休，盈利跌至警戒線、甚至乎開始見紅，便要向核心持倉埋手。點樣揀沽邊隻？稱得上核心持倉，一定有強烈理據坐貨，所以我傾向一刀切減倉，例如每隻股份都減持20%，最終目標都係增加現金水平，令流血速度減慢。
如果一早輕倉上路又如何？恭喜你，閣下有權在其他人斬倉的時間去博反彈，而我會揀跟大市關聯度大、跌幅夠深的股票去博，一來有值博率，二來會跟市行。總而言之，最緊要做好準備，到開市一刻才諗，陣腳只會更亂。
唐牛
fb︰https://www.fb.com/tongcow88
IG︰https://instagram.com/tongcow_88
YouTube︰https://www.youtube.com/channel/UCLwEpfQ6w1d-MUVlAS86QcQ
Threads︰https://www.threads.net/@tongcow_88
本欄逢周一、三刊出
