晨光追擊│「嘉冠王」贏完又贏
更新時間：15:30 2025-04-26 HKT
發佈時間：15:30 2025-04-26 HKT
發佈時間：15:30 2025-04-26 HKT
字體大小
冠軍一哩賽日為香港馬壇盛事，照計越多外賓來港馬會會越開心，點知巴林代表「名俠」馬主先後想搵沈拿同郭能策騎卻觸礁，以上情況真係少見。
嘉冠王高質分子
「嘉冠王」兩戰獲一冠一殿。
第二場第四班一二○○米：「嘉冠王」同廄侶「天星」是一對孖公仔，一樣在三月九日初出，四月六日再度出戰，到了今日再次同日上陣，而兩駒目前成績也差不多，「嘉冠王」獲一冠一殿，「天星」則獲冠亞各一。
「嘉冠王」初出四十九蚊，信心及不上「天星」，上仗就唔同大注重飛捧到三倍，結果快閘守住好位，縱使入直路初一度受困，最後一樣輕鬆贏馬，同時證明新加面箍極有幫助。老實說，上仗締速並不出色，不過在慢步速下，跑出時間唔快是理所當然，最重要是姿態極佳之餘，蹄下敗將非比等閒，更重要已找到致勝竅門，高質分子可望贏完又贏。
增強再下一城
「增強」目前評分依然有利。
第六場第三班一二○○米：「增強」上季四戰全敗，但次次受熱捧下都殺入三甲，今季首戰跑第三輸半個馬位，接戰即以一點六倍全熱門姿態打開勝門，蹄下敗將包括及後多取兩W兩P的「手錶之星」。
「增強」跟手一仗再贏同樣係信心爆棚的一點六倍，而蹄下敗將中，有之後多取三W一P，在打吡大賽跑第三的「包裝福星」，賽事水準勁到爆！大前仗「增強」增程跑千四米首度落第，賽後一唞就三個半月，休息夠前仗復出跑番千二再發威，走大外疊追回第二。上仗「增強」再遇前仗頭馬「健康快車」，「增強」不止成功反先，尚要贏夠個多身位，顯示叉足電後更勁，目前評分依然有利，今仗可再下一城。
兆文
