古星輝 - 5G助停車場偵測水浸｜乜都5G
更新時間：00:00 2023-09-29
發佈時間：00:00 2023-09-29
發佈時間：00:00 2023-09-29
字體大小
月有陰晴圓缺，有誰會預計到早前香港竟然連續兩度受極端天氣來襲？十號風球之外，還有世紀暴雨，引致渠道淤塞、雨水倒灌，令多區嚴重水浸，泊喺低窪地區停車場嘅汽車更加完全淹沒於水中，真係睇見都心酸。
世事難料，但喺5G新時代，先進科技就提供咗一條出路。因應惡劣天氣所造成嘅影響，最近同事就特別物色咗一個偵測停車場水浸嘅方案，將5G結合物聯網嘅應用，專門幫助物業管理公司防患於未然，喺暴雨令停車場出現積水前發出緊急警報，等物管可以即時作出相應安排，減低車主損失，更重要嘅係保障人命安全。
偵測敏銳防患未然
呢個名為「5G智慧停車場水浸偵測方案」嘅商業應用有2大功能：首先是當系統偵測到停車場嘅水位達到預設嘅某一水平時，就會自動開動水泵抽走啲水；另外系統又會立即發出警報，即時通知管理處採取相應行動，例如通知車主預先駛走車輛，減低天災造成嘅影響。
科技有時會畀人深不可測嘅印象，但今時今日簡單、方便、易用先係王道！要預防停車場水浸，需要嘅嘢好簡單，最基本嘅係高敏銳度嘅智能感應器，加上5G連接，做到萬物互連，充分發揮物聯網嘅功能。
專業人員會先因應各個停車場嘅特性設計方案內容，例如視乎停車場嘅面積及位置釐定擺放智能感應器嘅數量。大家會先到停車場實地視察，選擇喺合適嘅位置例如牆身或去水位附近，放置智能感應器。
智能感應器會喺暴雨出現或其他原因，令停車場嘅積水上升到某個水平時，透過極高速嘅5G網絡，將數據即時傳送至伺服器，再連接雲端，並透過手機應用程式迅速通報物業管理公司，方便佢哋採取應變措施，減低車主因意外造成嘅損失。
常言道5G改變世界，科技改變未來，正正就係呢個意思！今日係中秋節，「但願人長久，千里共嬋娟」，祝願大家中秋節快樂！
和記電訊香港行政總裁
古星輝
