KellyChu - 為大自然保護協會蠔礁修復籌款吳宗權與7泳手挑戰2天80公里馬拉松泳 | Executive日記

專欄

更新時間：02:00 2024-11-11 HKT
發佈時間：02:00 2024-11-11 HKT

蠔類及其他貝類有着天然淨化海水功能，可改善水質及穩定海岸線，因此亦被冠以「海洋生態工程師」美譽。為支持大自然保護協會嘅蠔礁修復工作，8位游泳選手今個月將接受2天內完成80公里馬拉松游泳嘅挑戰，為計劃籌募資金。小妹欣賞佢哋嘅勇氣和熱血，身體力行為保護香港海洋環境出一分力。

　　8位泳手包括Andres Tung、Carmelo Ficarra、Dario Pong、Donal O’Neil、Douglas Woo（吳宗權）、Jonathan Lo、Ryan Leung和Thomas Launay，佢哋將挑戰環繞香港島一圈（45公里），再由海下灣渡泳至清水灣（35公里），全程約80公里。

　　佢哋每位都非常認真準備，接受咗長期且艱辛嘅專業訓練，確保體能和心理都準備好克服大海中各種艱難和險阻。成員之一嘅會德豐集團主席吳宗權表示，保護海洋係全球嘅持續目標，更係激發起佢哋決心作出挑戰嘅最大推動力。

　　據大自然保護協會介紹，一隻生蠔每日可以過濾200公升海水，淨化渾濁嘅水質，為海草、細小魚類和其他海洋生物種製造健康生態環境。佢哋3年前曾進行一項試點計劃，將機場第三跑道嘅海堤改造成一個功能完善嘅貝類礁，監測結果發現生物多樣性有所增加，現時正在探索創新方法修復大嶼山嘅蠔礁。是次「80公里馬拉松游泳挑戰」旨在為大自然保護協會在吐露港、后海灣和大嶼山嘅蠔礁修復計劃籌募資金，以改善香港水質。

KellyChu