謝霆鋒盼締造 華人香港演唱會歷史
發佈時間：03:00 2025-04-26 HKT
英皇大師兄謝霆鋒相隔25年再開演唱會，《Evolution Nic Live謝霆鋒進化演唱會》前晚舉行首場，霆鋒成為亞洲第一人登啟德主場館開騷，英皇集團主席楊受成博士安排包廂越嶺廳，拉大隊率英皇娛樂集團逾30名藝人及政商界名人好友共200多人捧場。霆鋒在首場演出後，在社交網分享感受，揚言寫下華人香港演唱會新一頁。
霆鋒昨日在社交網發文透露相隔四分一世紀才開騷的主因：「廿幾年嚟一直唔願意開平凡嘅『集體回憶』，直到同團隊精心設計、完成滿意嘅舞台（淨係舞台燈就超過2800盞），先至敢獻畀大家今次嘅演唱會，希望帶畀你們嘅體驗係獨一無二。一起寫下華人香港演唱會開館的新一頁」。
獲多位政商界名人及藝人捧場
啟德主場館前晚冠蓋雲集，政商界名人好友羅淑佩、蔡志明、馬時亨等及眾多藝人，星光熠熠，楊受成博士安排包廂，更特意為賓客安排品嘗霆鋒主理品牌《鋒味》精心準備的美食，全場讚不絕口。
英皇大家庭共30多位藝人到場支持大師兄，包括張敬軒、何佩瑜、女團VIVA、衛詩雅、歐陽震華及任達華等，容祖兒、蔡卓妍（阿Sa）、關智斌（Kenny）及李幸倪（Gin Lee）近乎企足全晚，又唱又跳，不斷叫喊。
祖兒和阿Sa自爆嗌到差些失聲，祖兒笑言：「我同霆鋒係同期出道，係同班同學，今日見到佢成為亞洲第一人率先於香港啟德體育園這個世界級場地開個人演唱會，真係既感動又驕傲！」祖兒表示，霆鋒隻隻歌自己都識，聽返簡直係童年回憶，完全係將自己的成長歷程show晒出來，都好期待自己快啲可以登上啟德大舞台。阿Sa也說：「睇返霆鋒以前啲MV，我諗佢都做唔返以前咁樣，真係回憶殺呀！」
老闆楊博士全程笑個不停，拉着大熱影后衛詩雅滿場飛，希望她能沾沾霆鋒旺氣，於今屆金像獎頒獎禮勇奪影后，為英皇電影《破．地獄》帶來傑出成績。而張敬軒知道霆鋒的舞台由英國團隊重金打造的矚目效果後，不禁思考如何提升現場感染力，與現場4萬多位觀眾互動。楊博士特別囑咐軒仔：「下個到你呀！」
AK把握機會與關智斌集郵
此外，MIRROR五子AK、Jer、Stanley、Jeremy、Alton前晚在啟德high爆，AK自爆當年有儲霆鋒閃卡，見到關智斌亦趁機集郵。而高海寧前晚都有捧場，在企位區貼近台邊狂影霆鋒。
