「職場女王」Son姐古董餐具傳承三代 紫砂茶壺手工精細極珍貴丨星級品味

有「職場女王」之稱的張慧敏（Son姐）近年將職場轉至飲食業，早前與一子一女在尖沙嘴開設了一間主打多國菜的餐廳Telicious，主理過百年的家族菜式，或許會覺得這餐廳與其他分別不大，但原來背後一杯一碟餐具和擺設，全部都有段故，當中與張慧敏的家庭有莫大的淵源！

相關閱讀：星級品味｜《淚之女王》演員髮飾價格達40萬震驚網民 金秀賢送金智媛減價波鞋屬「絕版碼」

「職場女王」張慧敏收藏逐格睇：

餐具聯繫三代人

訪問當日，張慧敏已經在餐廳內準備好一切，看見一套又一套中、西茶具、銀器和杯碟收藏，或許在其他人眼中，只不過是日常會用來食用的餐具，談不上是甚麼有價值的東西，原來對於這個見盡人生百態的「職場女王」而言，背後意義大於一切，亦代表着她與父母的一段關係：「我唔係專登去收藏，係因為紀念價值。你問我係咪好鍾意啲杯杯碟碟，反而係因為我屋企好鍾意飲飲食食，好似有啲人鍾意飲酒，所以會儲酒杯，咁我同媽咪又鍾意飲茶，所以咪會儲埋啲茶葉同茶具。有啲朋友嚟我屋企，係會專登嘆茶，所以有唔少茶具。」

在芸芸收藏品當中，張慧敏對Royal Selangor的茶葉罐有珍而重之的感覺：「我爸爸係馬來西亞華橋，嗰陣陪佢返去探親買，爸爸好鍾意金魚，當然買嘅原因都係為金魚，真係好靚，另一個有中式亭台樓閣嘅感覺，媽咪都鍾意飲茶，嗰陣佢用呢個罐儲茶葉，入面啲茶葉係我媽媽飲剩。」因為這個茶罐以真空設計，所以罐內的依然有淡淡的茶香：「呢個茶葉罐買咗最少20幾年，有啲嘢唔可以得memory，有時我好掛住佢哋都會拎出嚟，有啲係佢摸過同用過嘅嘢，可以做一個紀念。」

收藏藝術家產品

另一套餐具是有豬型圖案，當年張慧敏在連卡佛見到英國Arthur Wood的餐具後，急不及待買下：「因為我個女係屬豬，所以一見就買咗呢套餐具，起碼都有28、29年，而家已經絕咗版，有豬頭又有豬尾。」除此之外，她還介紹另一套餐具：「台灣陶瓷係楊莉莉，都係廿幾年前買嘅，唔記得價錢，我見仲有埋salt & pepper，而且個樣仲好似我個女，不過當事人拒絕承認，整定同佢哋遇上！」張慧敏提到的楊莉莉，為台灣著名青花瓷藝術藝術家，於當地以陶瓷工藝著名的鶯歌設立工作室；過往曾多次舉辦不同展覽，又曾為當地政府設計宴會餐具、外賓禮品。

紫砂茶壺有靈魂

至於張慧敏的媽咪因為喜歡喝茶，亦因此有不少紫砂茶壺：「因為媽咪好鍾意紫砂茶壺，所以嗰啲景德鎮紫砂茶壺配套，都係幾廿年前買㗎喇，但係當年都唔平嘅，大概5000蚊左右，因為買嗰個人係有背後故事，又有經歷，好似付予咗個靈魂喺入面。」
 

張慧敏退居幕後做軍師？

銀器餐具都是嫁妝

張慧敏亦分享了一個秘密：「因為英國嘅傳統，屋企啲銀器同餐具都係畀女做嫁妝，而唔係畀仔，我爸爸好錫我，基本上好多嘢好似啲袖口鈕，打火機都係留俾我，冇話畀佢啲仔，反而我係主動拎啲出嚟分畀哥哥。可能係同爸爸媽媽一齊住，我啲仔女都係阿公阿婆湊大，所以感情係好好，嗰啲生活習慣都好近似，家教各樣都係一代一代傳落去，係好難得嘅緣份，唔知係幾多輩修成嘅正果，可以喺阿公阿婆照顧下成長嘅小朋友係好幸福。不過我嘅嘢已經唔係我，始終生帶唔來，死帶唔走，繼承爸爸媽嘅傳統，而且阿公阿婆錫佢哋多過錫我，所以咪畀晒啲仔女，如果你講分家，已經分咗9年。」

收藏意義大於價值

對於這些名貴餐具的日常打理，張慧敏坦言好少用：「我係有個櫃keep好，平時好少用，價錢唔敢講，但價值一定係無價。有時好掛住爸爸，咪拎啲酒杯出嚟摸下，記番嗰陣佢拎酒杯嘅時候，嗰個感動會喺度。本來最好梗係可以再留返俾我啲孫，等佢哋又睇下，但係世界唔同咗，如果佢哋鍾意嘅咪繼續keep，就算佢哋唔鍾意，捐咗佢，或者拎出拍賣都有啲錢，我覺得都好有意義。」

話雖如此，不過現在張慧敏亦減少買餐具：「我哋都重視儀式感，有時買吓傾下，又會記得番當時嘅嘢，有過回憶，呢啲先係最窩心。不過而家年紀大買少咗，又要搵地方擺，除非真係見到啲好可愛又好得意嘅先會買，貴精不貴多。而家我會學習活在當下，好似去旅行少買嘢，又重又驚打爛，心有掛礙。去玩最好係無牽無掛，無謂同自己過唔去，我又唔鍾意相機周圍影，不如記住仲好過拎嚟睇。」

張慧敏為女兒做Model？

現階段張慧敏與一對仔女齊齊創業，她亦曾對一對仔女說：「呢個係你阿媽今生最後一個大project。今次做佢哋嘅顧問，始終我係會走，佢哋又會獨立，可能我而家嘅嘢同做嘅嘢佢哋未必會認同，或者去到某一日，發生咗啲一啲，佢哋會記得我係點樣去處理。呢種相處同了解喺而家嘅家庭唔多，希望將來有一日佢哋組織個家庭，明白要維繫其實唔容易，你又唔可以唔愛自己到一個點，無私地奉獻，係冇意義，但係亦都唔可以自私用自己方式過活。」

問到她會否覺得滿足？她直言：「喺呢一刻唔講得上，但會係一個挑戰。我唔會後悔自己做過嘅所有決定，當然你問係咪有好多嘅事與願違，好多嘅措手不及，呢個一定會有。」張慧敏提到當時開餐廳時，難找裝修，加上因為疫情內地不少廠房停工，最後要延遲半年才能開業，不過她認為能夠仔女提供一個學習機會：「可以證明俾佢哋睇，計劃趕不上變化，你阿媽唔係樣樣嘢都可以控告，而係點樣去修正，點樣去繼續唔放棄，亦都可以考驗一下個智慧。唔係乜都唔會成功，但係原來你試咗，人哋覺得係麻麻，或者唔應該係咁，咁你就應該收檔，真係壯士斷臂，輸少當贏。」

相關閱讀：10位名媛女星時裝周衣着逐個睇！湯唯全智賢穿Burberry展氣質 女神D&G透視裝掀熱話丨星級品味

經歷過後，張慧敏得出一個結論：「我呢排有一個好深切體會，精誠所至，金石為開，原來當你好努力去嘢嘅時候，真係會有啲座力會幫到你，好似突然間咁啱Manful（松藝館前總廚李文龍）又出咗嚟，佢都話『唔好理咁多，大家兄弟班試咗先』，將我哋以前食過嘅蛋包飯、威靈頓牛扒呢啲童年嘅回憶拎出嚟，由佢哋帶返個訊息出嚟。」

慨嘆香港飲食業千瘡百孔

不過張慧敏也坦言對於港人北上消費前感到好乏力，更直指香港飲食業千瘡百孔多時：「好坦白咁講，我都做到好乏力，真係山窮水盡，但係為咗一對仔女，而且我又覺得行緊呢樣嘢係啱，係好多人北上消費，有啲人話香港飲食業係好死，但係香港嘅飲食業千瘡百孔，唔係今時今日嘅事，好難一言既之，但係問題係我做嘅嘢，佢哋喺上面食到咩？你喺我呢度食飯嘅氛圍係好relax，食飯最緊要係氣氛同心情，就算當你係上賓式咁招呼，但係冇咗親切感，你嚟食飯，我提供服務係好應該，不過唔代表我要卑躬屈膝。」

張慧敏否認轉型做KOL

近期張慧敏在不少平台出現，有人形容她轉型做KOL，甚至進軍娛樂圈，不過她說：「我唔認自己係KOL，你話我係influencer，呢個我係認。因為我講同做嘅嘢係有人睇，係有粉絲，我係影響咗佢哋，對我嚟講責任係重大好多，因為我言行係影響緊佢哋。」

張慧敏直言近年大家都過得不容易，有冤無路訴：「原來透過我嘅文字同短片，可以令到佢哋得到一啲力量同睇法，甚至指引同祝褔，對我嚟講係功德無量。」不迥對於KOL她就落閘：「KOL對我嚟講係另外一件事，我無意貶低任何人，我只不過係以一個同行者、過來人嘅分享。我冇KOL講得咁叻，只係pk p得多，總之有賭未為輸，只係在於你肯唔肯嘗試啫。」

張慧敏更笑說：「只不過係搵食艱難，有時都要多謝人哋畀面，以前我好衰，冇錢嘅就唔會去，但係期間如果有多啲機會，有啲途徑將Son姐呢套理論傳出去，可以令大家好過啲，有多啲平台可以俾多啲人聽到，咁What have i got to lose？（我有乜輸呢？）」

自信做主持媲美金牌司儀

至於有否被邀拍戲？張慧敏坦言：「試過同人有傾過，但係我都衰格，曾經有個電台話同我開個節目，但係最後係不了了之，言談間佢就有講話搵個監製夾我係唔容易。我覺得我嘅能力，做一個節目絕對勝任，又或者做主持唔會比金牌司儀差，只要你問題識得問，而且又有深度，又問得中，帶動到被訪者講到一啲新嘅觀點，不過重點係你以為你有啫唔，唔代表人哋都唔認為你有。」

張慧敏坦言昔日自大、心有不甘，不過現在變得隨和：「你問我會唔會覺得心有不甘，這些機會不屬於我，坦白講，我以前係會有，我都幾自大，覺得唔搵我就係你嘅損失。而家我會覺得，呢啲機會冇畀到你，可能係因為你未夠好，又可能你嘅好唔係人哋想要嗰啲，想要個隨和啲，咁我肯定唔係是但同隨便嗰個。」

撰文：Grace Ho
攝影：鄧國良
場地提供：Telicious（尖沙咀山林道36號地下）
服裝提供：女皇의 

其他文章：

TVB頒獎禮女星衣着首飾品牌逐件睇！佘詩曼鑽飾近70卡 高海寧撐國產設計夠高雅丨星級品味

佘詩曼《新聞女王》主播Look逐個睇！200元平價品牌着出霸氣 只穿黑白靠名牌袋添玩味丨星級品味

名音樂人王雙駿靚帽珍藏全公開！有頂全球獨有 為陳奕迅火燒帽最有味道丨星級品味

21位名人雪地用品逐件數！黎姿名牌褸件件過萬 TVB女星追捧親民價滑雪服丨星級品味

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ