古星輝 - 5G加持智慧辦公室 | 乜都5G
講到普級5G，一般討論都圍繞着如何提升鄉郊或偏遠地區嘅網絡覆蓋及速度，對於位處巿區黃金地段或核心商業區嘅甲級商廈，以至近年相繼落成嘅超甲級商廈（超甲廈），流動網絡及固網匯流，擁有贏在起跑線嘅優勢，又係乜嘢光景？
當一個地方已經擁有超級無敵嘅電訊基礎設施，客戶嘅要求更高一線，電訊商於提供服務方面更須精益求精，力求盡善盡美。繁忙地區係各電訊商必爭之地，滿布天羅地網；先進嘅5G網絡、高速流動寬頻、光纖網絡及Wi-Fi覆蓋，拱照整個區域。
網絡覆蓋「零死角」
有咁強嘅網絡後盾，我哋講緊要提供嘅已經唔係普通覆蓋，而係要做到「零死角」，即係要全面覆蓋辦公室每一個角落，以支援智慧停車場、智慧物管，以至各式各樣嘅智慧辦公室方案。配合巨企對企業網絡及網絡保安嘅唔同需求，我哋更可以為客戶打造專屬嘅5G專網 。
最近，我哋好榮幸為中環一超甲廈擔任指定網絡夥伴，肩負着打造劃時代智慧辦公室嘅大使命。
眾所周知，智慧辦公室係發展智慧城市嘅重要一環，其環球市場規模估計於今年達516億美元，預計於2029年增長至976億美元。一場疫情後，混合工作模式日漸普及，工作場所嘅配套及設備亦趨全數碼化，加上數碼轉型係巿場嘅大趨勢，企業積極採取網絡保安措施，對於先進嘅智慧辦公室解決方案需求若渴。
建基喺擁有世界級通訊設施，網絡連接無縫嘅優勢下，我哋為企業物色咗一系列方案，打造極致嘅智慧辦公室體驗。當中最為人所知嘅喺智慧「環境、社會及管治」（ESG）方案。企業透過建立物聯網，可遙距及自動調節照明及空調系統，環保之餘亦有助打造舒適嘅工作環境。當然，再巧妙融合智慧會議室方案、智慧辦公室設備、虛擬桌面、虛擬辦公室、人工智能服務大使、智慧自助服務系統等，更能有助企業進一步實現高效率嘅數碼管理，達致ESG目標。
能贏在起跑線當然無懈可擊，但能力越大，責任越大；要成功，都係果句——「要贏人，先要贏自己」。
和記電訊香港執行董事及行政總裁
古星輝
