關志康 - 可惜我爸不是拜登 | 神耆商機
關志康
2024-12-09 02:00
字體大小
近期一個飯局上，大家都在八卦日前局長換人的新聞。現在大老闆普遍都有個心態，就是「只選擇，不教育」，有一位老企業家直言：「改變一個人費時失事，同揀股票一樣，唔啱就『換馬』，最緊要快、靚、正。歌仔都有得唱『現代說永遠已經很傻』。以前炒股炒到個好位可以有排坐，𠵱家到『新』世界了，CEO張櫈未坐暖已經要起身！」
然而，自己兒女則剛剛相反，是不能「選擇」，只能「教育」。有位老前輩語重心長地訓誨：「在馬場永遠唔好『彈』人隻馬；在商場永遠唔好『彈』人個仔。兒女喺父母心目中永遠都是寶貝；即使全世界都覺得不濟，父母依然能看見仔女身上的優點。」事實上，不論是主觀感受，還是過分溺愛，任何人聽到對自己仔女的批評，相信都不會開心。
有位老前輩扯到另一宗新聞：「美國總統臨卸任前都特赦自己個仔，引發朝野譁然，備受黨內外的質疑和抨擊。佢仲話希望美國人民能夠理解，為甚麼一位父親和總統會做出這樣的決定？為甚麼要出爾反爾？寧願自己核突，都唔想兒子受牢獄之苦，呢啲咪就係愛子心切囉。佢做到總統，你估佢無腦咩？」
另一位老闆娘苦笑回應：「真可惜，我爸爸不是拜登！佛家講得有道理，子女一是報恩，一是報仇。好似我個女搞離婚、爭撫養權，仲慘過我自己離婚，搞到我都心力交瘁，佢真係乜仇都報晒。我自己離婚仲可以自己決定點樣做；𠵱家講佢又唔聽，又要我出動棺材本幫佢打官司，下個禮拜仲約咗舊親家出來和談，估唔到幾十歲人都要家長出馬！」
其實「養兒一百，長憂九十九」是否必然？是否越來越普遍？這種擔當又是否影響着銀髮族的消費和投資模式？
健康教育基金會主席
關志康
更多文章
