胡慧沖 - 我最怕看的一套泰國電影 | 筆泰沖動
泰國電影長久以來畀人感覺就係得兩樣嘢，第一：搞笑，尤其加入跨性別人士的內容。第二：猛鬼，要幾恐怖有幾恐怖。事實上以上兩大片種喺泰國都經常出現。泰國人係一個開心嘅民族，所以就算更粗俗嘅笑料都會照單全收，唔會覺得屎尿屁好Cheap。至於鬼故，因為泰國人特別相信鬼神的事情，所以這些電影亦都會大賣，尤其涉及到因果報應的。
但近年泰國電影都有好多新出路，譬如之前《出貓特工隊》又或者一些愛情小品，甚至乎一套描述婆孫之間的電影《全職乖孫》，這套電影之前我喺泰國睇咗喊到九彩……除了因為內容感人，主要亦都因為我自己個人關係……自小跟公公婆婆長大，所以投入了便邊看邊落淚，沒有刻意的煽情，只有感人的溫情，某些位會令你引起共鳴，尤其是曾經跟老人家相處的。可能你會覺得老人家囉嗦老土，但有一天他們不能夠再跟你囉嗦老土的話，回頭想起就會有很多思念，甚至遺憾。
很高興見到泰國電影能夠有多方面的嘗試，嘗試之餘，以這套電影為例喺泰國大賣，衝出泰國在印尼、台灣、馬來西亞等地方都有很好的票房紀錄，今次嚟到香港唔知會唔會得到大家接受，又或者當一個情感發洩，進場大哭一輪……整套戲其實唔係賣慘，而係賣一些溫情愛情以及價值觀念。
可以說泰國的老人家基本上比香港的老人家幸福，因為大多數當地人都會照顧家中長者，甚少會兩口子為了生活就把老人家送進老人院。自己眼見很多泰國朋友縱使家中長者重病在床，就算負擔不起醫院的費用，也會讓他們安在家中天天照顧，甚少會交由其他人代勞……片中對親情、家庭，尤其是年老長者的觀點既真實亦感人，電影發行公司知道我下周回港想邀請我去睇，但我已經拒絕咗，因為自己當年實在有愧於已故的婆婆……上次喺曼谷睇時觸景傷情，已經喊得慘過睇《阿郎的故事》，唔想返到嚟再畀大家見到我嘅淚容……提提大家入場睇戲記得帶備紙巾。
胡慧沖
