Ian個唱勁騷肌掀高潮 派親筆信冧爆歌迷
MIRROR成員陳卓賢（Ian）一連七場首個個人演唱會《IAN CHAN“TEARS”IN MY SIGHT SOLO CONCERT 2024》，前晚在亞洲國際博覽館開鑼，當晚Ian除衫大騷麒麟臂及胸肌掀起高潮，引粉絲尖叫連連。
今次「hellosss」（粉絲暱稱）租用亞洲國際博覽館場地，放置超過30個應援擺設供粉絲打卡，並有大型留言板，讓大家可以向Ian表達心意。入場前，逾300位hellosss在場地內影大合照兼嗌口號，場面震撼。一開場，音樂監製徐浩與一眾樂手及管弦樂團樂手齊齊穿着白色服裝進場就座，隨後Ian白色Look現身，以鋼琴彈奏《One Summer's day》，造型似足「白馬王子」，之後他換上結他，一連唱出《Lost at first sight》、《DWBF》。當Ian獻唱《Thank you Postman》時，舞蹈員向台下觀眾派發信，引觀眾紛紛舉手索取。唱罷後，Ian搞笑謂：「唔使擔心，唔係情信，寫咩唔話你知！真係我親手寫，新鮮滾熱辣㗎！」
Ian自嘲朋友不多，更形容自己跟「52-hertz鯨魚」相似，這種鯨魚只收到某些音頻會感覺自己被孤立，又自言不懂社交，今次請來音樂上未曾合作過的歌手，反而打籃球合作過，隨即介紹吳林峰出場。吳林峰大讚Ian外表感覺好Cool，但內心好溫暖，做事亦好執着，不會讓自己舒服，就算打籃球時亦一樣，隨後更送了一部菲林相機給Ian，表示：「菲林相機某程度幾麻煩，要準備菲林、搵時間曬相、校光圈，未必次次影到，但一個好嘅好處會令你靜落嚟！透過Focus睇個世界。我知道你係唔會放過自己嘅人，仲有六晚時間，我知你準備好多送畀每位入場觀眾，希望呢個騷同樣係送畀你自己嘅禮物，希望你每一晚慢落嚟！」
向家人獻掌聲
而當晚的其中一個高潮位，是Ian穿皮外套唱《夜視鏡》後，突然除下外套、只着黑色背心，大騷麒麟臂及胸肌，隨即跳唱團歌《Sheesh》，令在場粉絲瘋狂尖叫。到了演唱會尾聲，Ian表示家人都有入場欣賞，家姐更特登由外地飛返來，並叫觀眾畀掌聲他的家人，最後他以一首《正式開始》為首場個唱畫上完美句號。
