KellyChu - 首批外籍港人領通行證 攜妻女玩番轉 奧商會前成員大讚北上消費又平又好 | Executive日記
KellyChu
2024-08-05 02:00
字體大小
居港22年嘅奧地利商會前委員會成員Alfred Buchner，成為首批持通行證北上嘅外籍港人。佢上周末攜同太太阿囡去深圳一日遊，大讚自助過關快捷方便，形容政策嘅一小步，係連接交流嘅一大步，又指深圳有好多新落成建築，飲茶埋單只係香港一半價錢，服務員態度良好，未來計劃去更多內地城市旅遊。
非中國籍嘅香港永久性居民上月起已可申請通行證，Alfred為方便來往香港同內地工作，成為首批攞到通行證嘅外籍港人，佢亦跟隨港人潮流，體驗北上消費。
Alfred大讚自助過關時，系統識別出佢嘅國籍改用德文顯示，印象深刻，過程只係用咗約5至10秒，而以往過關至少要半個鐘。佢話作為商人經常要用簽證好唔方便，現時用通行證容許逗留90天，無論係商務定旅遊都好方便，贊同政策嘅一小步，係連結交流嘅一大步，身邊唔少朋友都向佢哋請教辦理流程。
佢哋一家三口到埗後先去咗飲茶，表示埋單300蚊，價錢係香港嘅一半，仲食得好飽，有好多未見過嘅點心。雖然服務員唔識英文，但主動提供英文餐單及接受信用卡付款，態度良好。Alfred亦指，事隔7年冇去深圳，感受到好大變化，例如口岸外面有多幢新落成建築。
17歲女兒Patricia Buchner就第一次去到內地，認為當地人唔習慣用英文交流，而自己只係識「少少中文」，所以溝通冇香港咁方便，但強調唔影響整體體驗，指內地嘅商場比香港大，可以玩足一日。
KellyChu
更多文章
