KellyChu - 港女勇闖廣州「相親角」 身高不合遭當面拒絕 | Executive日記
KellyChu
2024-12-10 02:00
字體大小
小妹唔少內地朋友都相當重視結婚，大學畢業後紛紛成家立室，反觀香港人年過30先拉埋天窗嘅比比皆是。故此內地亦有相親文化，其中「相親角」就係指父母為未婚子女尋求合適對象，於公園內貼出子女學歷、收入、家底、擇偶要求等資料，等途經路人可以前來「相親」嘅手段。
日前一名港女就特意前往廣州天河公園嘅「相親角」實測，睇吓係咪可以即場搵到心儀對象。佢透過小紅書分享實測結果，表示現場不少履歷嘅未婚人士，其實條件都唔差，例如有車有房，亦有研究生各種高學歷人士，有人甚至連全家無貸款、父母有退休金都寫出來。
樓主稱自己喺香港「無車無房」，所以想了解吓自己嘅市場價值。佢搵到一個身高174厘米、收入大約3萬多、戶籍哈爾濱嘅男生履歷，遂與在現場嘅母親聊天，但不料被對方一口拒絕，話佢年紀頗大，而且身高只有154厘米，認為對生育孩子會有影響。佢之後繼續尋覓對象，但又發現自己身高唔合格，坦言喺內地相親，女生收入反而唔重要，重要嘅係身高。
KellyChu
更多文章
