KellyChu - 特等頭等座位及逾百件珍藏品 港鐵「站見」展上直通車的蛋撻 | Executive日記
KellyChu
2025-02-11 02:00 HKT
字體大小
港鐵去年4月起喺紅磡站舉辦「站見」鐵路展，展出多款退役列車，深受巿民歡迎，已錄得逾7萬人次入場參觀。展覽上月23日已再度開放給公眾預約免費參觀，並新增九廣鐵路直通列車「九廣通Ktt」及相關展品，俾大家一睹當年一票難求嘅直通車特等位，有乜特別，原來有免費奶茶咖啡任飲。
Kelly昨日到場參觀，被呢架車身以綠、藍、白色為主嘅雙層列車吸引，要知道平日喺香港雖然經常睇到雙層巴士，但雙層列車可謂罕見，頭等車廂一排有4個座位，而特等車廂一排則有3個座位，更加闊落，當年票價要200多元，較頭等貴40元，對普羅大眾而言唔平，皆因直通車每天班次有限，供不應求，尤其特等車票，只比頭等車票貴40元，就可以享受喺旅途上任飲以瓷杯裝載嘅奶茶同咖啡，加錢仲可以食到泰昌港式蛋撻，坐得舒服之餘，仲可以自製非一般嘅下午茶，轉眼就到廣州，值回票價。
市民除咗可以登上雙層列車參觀，亦可以喺展覽內睇到九廣通員工制服配飾、列車模型等相關展品，了解本港鐵路發展。同場也展出了3列退役列車，包括東鐵綫第一代電氣化列車「黃頭」、中期翻新列車「烏蠅頭」和56號柴油電動機車「杜利華號」，以及過百件鐵路珍藏。
市民逢周二至周日及公眾假期可以入場，需先到展覽網頁預約免費參觀（https://stationrailvoyage.mtr.com.hk），而展期暫定去到今年年底。
KellyChu
直通列車「九廣通Ktt」。
更多文章
