KellyChu - 1.3萬4小時可操鏟雪機 港人遊日「畀錢鏟雪」樂不疲 | Executive日記
KellyChu
18小時前
字體大小
日本北海道冬季白茫茫一片，鏟雪係當地居民日常。有旅行社就發揮奇思妙想，推出「鏟雪體驗」活動，等遊客親自動手鏟雪，仲可以試用鏟雪機；4小時體驗共收費25萬日圓（約1.3萬港元）。雖然活動收費唔平，不過唔少香港、內地遊客好受落，積極報名。港人少見到雪係事實，鏟吓雪應該都好有意思，不過同時亦有網民講笑話：「畀錢去做苦力？」
日本一間位於北海道札幌嘅旅行社，日前推出「鏟雪體驗」活動，指能令遊客更深入了解當地文化，與當地居民建立情感聯繫。參與者喺活動中，可親身動手鏟雪、學習當地居民嘅鏟雪技巧，更可以試用鏟雪機。活動每年1至3月初舉辦，4小時體驗收費約1.3萬港元，包含來回嘅交通及膳食。雖然價格稍貴，仍吸引唔少海外遊客參與，其中不乏來自內地、香港、台灣嘅遊客。
呢個活動最近喺網上亦引起熱議。有網民認為，鏟雪其實係勞動，「畀錢去做苦力？」、「佢唔去地盤畀錢鏟泥嘅」、「不嬲有鏟雪換宿，幾時變咗要畀錢鏟？」不過，亦有人認為，鏟雪作為文化體驗，其實幾有意義，「終於有一樣觀光體驗唔係災害」、「玩埋架車其實幾抵玩」、「香港係熱帶，未見過雪係咁」。
KellyChu
