Wonka Bar、果汁糖 spray、青檸批 Kit Kat！倫敦美式糖果店熱潮
4 月除了是復活節，仲係年中 term break，學生連埋復活節假，有近 3 星期假期，唔少人都會乘機去英國其他城市玩下，而我哋都快閃 3 日 2 夜南下倫敦玩番轉。由諾定咸去倫敦，其實都好方便，除了可以搭火車，其實搭 Coach 都抵又舒服，6 鎊一程，幾個鐘就到倫敦市中心，仲有幾個落車點可以選擇。今次除了去大英、唔同博物館，行街街都係主要項目。大鄉里出城，估唔到倫敦有咁多美式糖果店！每間都入去逛逛，sweet tooth 表示好開心。
曾幾何時，香港都有糖果店主打美式糖果朱古力，可惜只得一兩間，熱潮 hit 唔起。不過來到倫敦，這股美式糖果風潮卻唔止 hit 得起，仲產生連鎖效應，單是一條 Oxford Street 及周邊，便有近 10 間美式糖果店，非常誇張。行過好幾間，心水係呢間 AMERICAN CANDY，成間店色彩繽紛，無論大人細路入到去都會好開心，因為朱古力糖果薯片款式多又特別。糖果朱古力品牌如 Hershey’s、Reeses、M&M’s、Snickers、Mars、Skittles、Oreos、KitKat、Nutella……唔少都是香港人熟悉的品牌，不過口味款式卻有新意，好似 KitKat 的水果 cereal 味、青檸批味、M&M’s 的 Brownie 味、Coffee nuts 印象中在香港無見過，仲有 Mars 朱古力餅、朱古力醬、baking 材料等食品，朱古力迷肯定買到唔停得手。
小朋友有睇過英國作家 Roald Dahl 的《Charlie and the Chocolate Factory》﹙電影《朱古力掌門人》﹚見到一排排的 Wonka Bar 份外興奮，每排朱古力都附上 Golden Ticket，雖然無得去 chocolate factory，都可以留個紀念。店內仲有一枝枝 candy spray，噴入口係果汁糖味，噴咗當食咗。朋友女兒大力推介一款 cereal，一盒早餐脆脆之外，仲夾雜唔同口味棉花糖，仲話係鬼妹同學最鍾意呢款。不過價錢唔平，一盒要近 10 鎊，即係近 100 蚊港元一盒！
