【小說】灑滿落英的街角（三）｜與中佬的相撞
前文提要：若蘭找到一份接待員的招聘，於是上門見工。
Helen收到若蘭的電話：「唔係話今日見工咩，咁快出嚟？衰咗？」
「掂咗呀，下星期就返工喇！」
「唉，都話靚女打橫行喇！」
「幾十歲人，仲邊有得靚吖！都有要求㗎，要打字，又要用英文同埋普通話對答，仲要沖咖啡！」
「嘩，私人秘書都係考呢啲喎！揾到工咁高興，過嚟我公司呢邊，我同你食個飯慶祝吓。」
「唔得呀，我架車正話見工時喺公司樓下個停車場俾人撞咗，我而家要車去車房整先呀。」
「人撞你喎，咁快攞去整？佢賠咗俾你未先，如果保險唔賠點計？」Helen真不愧是一個女強人，若蘭都未有機會講解事情始末，她就已經把所有可能性列出，還是站在若蘭的角度看。
「係佢撞我尾，但係我冇要佢賠呀。我睇佢係司機嚟，雖然佢個款都幾四正，唔講以為係老闆，但係咁大架Maybach點會老闆自己揸，要佢賠即係要佢自己出錢，仲會冇埋個獎金，我見我呢架車仔整都係三兩千，算喇！而且我而家揾到工，可能係好心有好報呢！」
若蘭就是有這項絕技，永遠會為別人著想，Helen雖然覺得既然是對方失誤，就當然是對方賠，但認識了若蘭幾十年，也知道她是不會向一個司機追討撞車費，但也不忘提醒：
「咁有冇寫返張紙互不追究呀，咪等陣佢掉轉頭claim你呀！」
「唔好成日諗壞嗰面啦，嗰位先生好好人，仲係佢提我要抄身份証同埋電話，仲叫我第二次唔好隨便信人添！」
「抄身分證咪得囉，仲要交換電話？會唔會佢想抄你牌呀？」
「咩呀，唔同你講喇，停車場夠鐘喇，俾多個鐘泊車就唔抵！」
「你慳埋慳埋都唔夠幫人出整車錢喇！」
「兩回事，一個係幫人，一個係唔益大集團！」
「唔同你呢啲花姐講！」
「咩花姐呀，又幫我改花名！都未問你上次話我係三個五係乜嘢意思？」
「哈哈：三個五！人地要嚟形容嗰啲高危被炒一族，話佢地中五畢業，年近五十，人工五萬。」
「咁關我咩事喎，我人工得兩萬三咋！」
「你咪中五畢業，年近五十，五年工作經驗囉！咁都俾你揾到工，算你威！」
（下期續）
