【飲食】印度美食｜咖喱係釋迦牟尼修行時食嘅醬汁？印度從冇一道菜叫做咖喱？
咖喱，風行全世界，大如元宇宙。
印度、巴基斯坦、印尼、泰國、星馬、緬甸、日本、台灣、香港、英國、美國、澳洲、新西蘭……甚至中東、非洲等地皆有。然而，追本溯源，咖喱源於印度，但印度卻從冇一道菜叫做咖喱，到底發生咩事？
泰國咖喱炒蟹，加咗雞蛋和椰奶做醬汁，惹味非常。
從印度出發
各位同學，今堂講咖喱。咖喱可真厲害了，追尋佢嘅足跡，可以從印度出發，跨越重洋去到英國，再傳遍歐洲大陸，再由歐洲散播到美洲、非洲，繞了世界一圈，又返到亞洲，喺東南亞、日本等地落地生根，最終遍佈全球，仲因地而變，慢慢成為唔同地方各有唔同口味，終成地球界食物。傳播之廣、影響之深，幾乎冇一種食物可以相比。
五顏六色的印度咖喱，各有不同味道，睇見流口水。
又關佛祖事
咖喱最初嘅模樣，到底係點嘅呢？咁要返到好耐之前嘅印度，當地民間，有個關於咖喱起源嘅口耳相傳故事。傳說話早期印度人認為豬肉有陣味，羊肉又羶腥，加上佢哋奉牛為神明，唔會食牛肉，於是近乎無肉可食。後來，印度人發現釋迦牟尼修行時，會煮一種醬汁嚟食，呢種醬汁係將幾十種香料放入鍋內熬煮而成，味道濃烈複雜，可以蓋過豬羊嘅羶味，大家於是照辦煮碗，後來更成為印度人的日常料理。但係，咖喱並唔係菜式名稱，係一種烹調方法，名稱起源，普遍認為源自香料（karileaf），不過最多人接受嘅講法，係來自南印度坦什米爾語kari，意思即係綜合各種辛辣香料所烹調而成，帶有醬或湯嘅意思。
星洲冇星洲炒米，呢個落咖喱炒嘅米粉，係香港人發明。
英國人瘋傳
本來呢種烹調方法，只係存在喺印度本土。到咗17世紀，印度成為英國殖民地，大量香料運回英國本土，「咖喱」呢種綜合香料調製法，開始喺英國流行。19世紀，英國人已經識得將香料同奶油混合，調製成杰撻撻咖喱醬汁，用嚟煮菜煮肉，甚至煮湯。由於合成咖喱嘅香料超多，動輒就有薑黃、芫荽、乾辣椒、丁香、肉桂、茴香、肉豆蔻、黑胡椒、辣椒等等，為咗方便使用，就有英國公司首創將所需香辛料磨成粉末，簡單方便嘅咖喱粉，乃應運而生，亦快速助長傳播普及，咖喱一下子傳遍整個歐洲。
日本咖喱會落水果嚟煮，味道較甜，別樹一幟。
重返亞細亞
後來，咖喱又隨着歐洲人全球殖民，再傳到中南北美、非洲大陸及亞洲各國。像日本，早在大正時代開始接受歐美飲食文化，1860年，明治維新啟蒙之福澤諭吉，喺佢翻譯嘅《增訂華英通語》辭典中，首度出現了咖喱（curry）呢個辭彙，可說係第一個將咖喱引入日本嘅人。至於香港，當然係1842年，隨着香港成為英國殖民地，大量印度人隨英國人來到香港當兵或經商，咖喱開始喺駐港英軍軍營嘅食堂及餐廳出現，逐漸傳到本地民間，發展成今日嘅港產咖喱文化。咖喱始於亞洲，浪遊歐洲，傳到美洲非洲大洋洲，兜咗一大個圈，最後又傳返亞洲，真係名副其實嘅世界美食啦！
坊間有大量即食咖喱供應，想自家煮冇難度。
