【飲食】南洋之寶｜叻沙叻在夠複雜 名稱來自梵文十萬嘅意思
咖喱、辣椒、薑花、南薑、香茅、紅蔥頭、辣椒、蝦膏、洋葱、叻沙葉、巴拉盞、羅望子、亞參果、椰奶……一連串長長嘅香料配料名稱，其實只係組成叻沙湯底嘅冰山一角。叻沙，呢種星馬國食，無論香料、配料、味道、風格，各處地方各處味，簡直可以用變化莫測嚟形容。
紅紅黃黃橙橙嘅叻沙，睇到就已經猛吞口水。
十萬種香料？
唔同嘅香料組合，變化成唔同味道嘅湯底。唔同嘅地方，又混調出唔同嘅口味，做成謎一樣嘅世界。咖喱叻沙、亞參叻沙、古晉叻沙、吉打叻沙、江沙叻沙、怡保叻沙、玻璃市叻沙、吉蘭丹叻沙、登嘉樓叻沙、柔佛叻沙……品種多不勝數，你聽過未聽過都有。咁又唔使奇怪，叻沙係個大世界，複雜就係佢原來嘅初心。
叻沙，又叫喇沙，馬來語名Laksa，這詞源於古印度梵文的 Laksha，是數量非常多的意思，其中Lakh就有十萬的意思，嘩！你話幾浩瀚。早期東南亞一帶，深受古印度文化的影響，中南半島西部沿海至馬來群島一帶，當地嘅飲食文化詞彙中，都可以發現Laksa呢個詞，或由呢個詞所延伸而出嘅名稱。
東馬來西亞嘅阿庇市，滿街都可以食到地道叻沙。
來自南洋娘惹？
不過詞雖嚟自印度，但係喺印度嘅飲食文化中，卻沒有出現Laksa一詞，甚至類似食物組合都從未出現過，估計係當時生活喺沿海或河邊嘅馬來人或其他東南亞民族，獨自發展出混合各種香料、魚類和麵條嘅料理，因為多種食材匯聚，唔同味道交織融合，因此借用梵文中嘅Laksha一詞，嚟表達超級無敵多嘅意思。
叻沙起源於南洋，發展到今日，已經成為馬來西亞及新加坡嘅美食代表。儘管真正起源已經是個謎，但有人流傳，佢係嚟自南洋嘅娘惹料理。娘惹（Nyonya）係指15世紀初期到17世紀之間，定居在馬六甲、印尼、新加坡、泰國和緬甸嘅華人同馬來人通婚生下嘅混血女性後裔。因為娘惹料理通常係家傳，各家各戶做法各有不同，口味就隨着唔同地域發展，變化出唔同地方嘅特色。
砂拉越叻沙嘅湯頭用咗馬拉盞，同椰漿而成，紅卜卜，香辣濃郁。
四大類型你要識
簡單分類，可以分出四大類型：咖喱叻沙（Curry Laksa）、亞參叻沙（Asam Laksa）、東海岸叻沙（Pantai Timur Laksa）和砂拉越叻沙（Sarawak Laksa）。
咖喱叻沙：使用咖喱椰奶湯頭，多搭配米粉同油麵，新加坡最流行就係呢種；
亞參叻沙：是用魚湯，味道又酸又辣，食落有魚茸喺入面，所以有少少腥鮮，以檳城最具代表性；
東海岸叻沙：最大特色係用魚湯加上椰漿做湯，湯頭呈奶白色，較為濃稠，吉蘭丹、登加樓就係以此馳名；
砂拉越叻沙：湯頭用咗巴拉盞（或稱馬拉盞，Balacan）混合椰漿而成，香辣濃郁，湯頭顏色十足紅咖喱，但就冇印度咖喱香料嘅成分，好弔詭。
單單睇見上面四類嘅分別，係咪已經頭都痛埋？其實使乜理咁多，黑貓白貓，捉到老鼠就係好貓。叻沙，好食就得啦！
香港本地都有馬來叻沙出品，即食湯底，非常方便。
