【飲食】海南雞飯同賭大細有關？唔係海南人發明 星馬泰誰是始祖？
一碟／碗油飯，幾件肥雞，蘸點醬料，呢個就係風行全世界嘅海南雞飯。
海南雞飯，新加坡、馬來西亞、泰國都有，最近連中國海南省，都加入戰團，全省各地紛紛湧現海南雞飯店，甚至有店聲稱自己才是海南雞飯鼻祖，到底成件事係點？邊個至係海南雞飯始祖？
海南雞飯並非海南人發明，而是源自星馬。
移民首創的美食
到底星馬泰中國海南島，邊個至係海南雞飯始祖？呢個問題，我哋容後再討論。但首先可以肯定嘅，係海南雞飯呢樣嘢，同中國移民有關。話說上世紀初，中國沿海省份，如福建、廣東及海南嘅居民，因故鄉經濟差，為咗搵食，紛紛坐船往東南亞，甚至遠至舊金山（即美國三藩市）及新金山（即澳洲墨爾本）等地謀生。其中馬來半島一帶，像馬六甲、檳城、新加坡等地，聚集了不少海南人，當中有海南籍小販，做起飲食小生意。他們挑著竹籃，一邊放白斬雞，一邊放有雞汁的飯糰，沿街叫賣，爲招攬生意，賣雞飯之餘，仲附設「賭大細」遊戲，小販隨身帶住三粒骰同空碗，用雞飯同客人賭輸贏，賭贏客人可獲免費雞肉及飯，賭輸則要畀錢食飯，這就是海南雞飯最初面貎。
星馬版的海南雞飯，雞都取皮厚肉嫩的品種。
馬來西亞落地生根
呢種雞飯，雖由海南人販賣，但直至八十年代改革開放前，喺海南當地都係搵唔到嘅。海南當地一直只有白切文昌雞，冇海南雞呢樣嘢嘅。估計馬來西亞嘅海南雞飯，係海南鄉里將故鄉嘅白切文昌雞，加劏雞剩嘅雞油混和香料煮成嘅米飯，蛻變而成嘅一種新產物。雖然邊個至係發明呢種雞飯嘅第一人，至今已經無從稽考，但據馬來西亞學者調查，上世紀二十年代，馬來西亞雪蘭莪嘅巴生港，當地華人梁居清已開店販售雞飯。幾乎同一時間，海南樂會縣烏皮村人王義元，來到馬國馬六甲，與同鄉一齊學做雞飯。1936年，再移居至巴生港開檔售賣雞飯，因此被認為是海南雞飯有確切記錄的始祖。
連外賣也有海南雞飯，受歡迎程度可見一斑。
新加坡發揚光大
但係呢個講法，新加坡並唔同意。根據新加坡學者嘅講法，王義元係喺1936年由海南島南下新加坡討生活，並擔住竹籮喺新加坡一帶叫賣，後來用積蓄喺桃園咖啡店擺攤賣雞飯，呢個就係新加坡版本海南雞飯嘅起源。儘管一個雞飯、各自表述，誰是始作俑者，莫衷一是。但係海南雞飯能夠開枝散葉，發揚光大，功勞應該喺新加坡。話說王義元嘅雞飯生意火紅，火紅到要請夥計幫手，其中一位夥計，叫做莫履瑞。莫履瑞因為打工，學識做海南雞飯嘅竅門，後來索性自立門戶，開了一家瑞記海南雞飯，經媒體報道，瑞記爆紅，儼如海南雞飯代表，莫履瑞賺錢後投資不同事業，又賺大錢，竟然登上新加坡富豪榜，海南雞飯熱潮也因他之名愈燒愈旺，後來更衝出國際，成為全球美食。
泰式海南雞飯，用的雞都是皮薄肉瘦的，口味和星馬略有不同。
泰國獨樹一幟
只是上世紀九十年代，莫履瑞嘅後代，因為個人因素，決定唔再經營瑞記，前員工四散，有人追隨莫履瑞侄兒莫澤安，去馬來西亞新山士乃開設「新瑞記雞飯店」，亦有人接受其他金主招攬，開店擔任顧問，掛着瑞記海南雞飯招牌，繼續經營。
儘管海南雞飯之源，引來星馬兩派之爭，但係美食無疆界，海南雞飯已衝破星馬國界，傳到他國，而且開枝散葉，獨樹一幟。好似泰國，就有自家的海南雞飯，泰語名Khao Man Gai，意即：雞肉配油炒過的米飯。製法和星馬也有不同，蘸醬只有用薑茸、椰糖、芫荽梗、泰國白醬油、醬油膏混調的泰式辣汁，不像星馬有齊黑豉油、薑茸和蒜蓉辣椒醬三種。雞也用皮薄肉瘦的品種，不如星馬用肥厚肉嫩的雞去做。飯也有不同，泰式用大蒜、生薑、芫荽梗等打爛拌勻食油，加入雞湯、雞肉一同烹煮。而星馬則用蒜碎、雞油和浸雞水，加香茅及斑蘭等煮成雞油香飯。儘管泰式海南雞飯別樹一格，卻從沒有介入元祖之爭，只默默做好這自家口味，誰先誰後，闊佬懶理，只知道人人去泰國都會食，那不就足夠了嗎？
曼谷水門，是海南雞飯重鎮，多間老字號名店都在此開店。
