【母親節】燕窩雪白反而唔靚？除咗養顏仲有咩功效？
今日乜都唔講住，講咗呢句先：謹祝天下母親，母親節快樂。
係呀！今日係母親節，母親生你育你，你有乜嘢回饋俾佢？咩話？我會乖？我會聽話？呢啲唔夠實在喎，阿媽棉乾絮濕咁湊大你，身心靈都需要滋養一下，不如請佢食燕窩啦。燕窩含有豐富鈣、磷、鐵、鈉、鉀等微量元素，又有胺基酸、碳水化合物、水溶性蛋白質同豐富燕窩酸，有養陰潤燥、益氣補中功能，除媽食咗肌膚水潤有光澤，精神飽滿，中氣十足，成個人都靚晒啦。
食咗燕窩不單潤膚美肌，仲可以補中益氣，講嘢都大聲啲。
燕窩點先算係靚?
咁點為之一隻靚嘅燕窩先，首先睇形狀，愈似船形或匙羹形最靚。跟住睇顏色，要色澤天然，白燕窩要有少少象牙色，千祈唔好過份雪白，因為咁樣可能被漂過，不單唔天然，仲會降低功效。黃燕窩則應該略帶微微米色或金黃色，至於血燕，千祈唔好揀鮮紅色，真正血燕應該是橙紅或灰紅色，愈鮮紅色的，極有可能係染色或熏製過，都唔係天然健康，功效亦成疑問。但無論邊種燕窩，愈乾爽愈好，如果拎上手感覺黐手同軟綿綿，就係水份多，好易發霉。揀嘅時候，亦可以用鼻聞，聞落有燕子口水味同少少腥味係正常，燕絲要幼而細密，浸發後變得愈大愈好，燉好之後有淡淡蛋白香味就係佳品。
民間流傳血燕係由燕子吐血築成，但呢個說法並無科學根據。
又關鄭和下西洋事？
咁正嘅燕窩，中國人最鍾意用嚟滋補，但原來中國人識食啫，原產地並唔係中國。燕窩其實來自東南亞，係金絲燕用口水製成嘅育兒巢，通常建構喺海邊峭壁山洞中。預備生產嘅金絲燕媽媽，會用口水配合絨毛、草葉、植物莖稈嚟製作燕巢，俾幼燕喺燕巢入面孵化和成長。幼燕成長後，燕巢就會被棄置，採燕窩嘅人，就會喺呢個時候攀岩採摘。挑除絨毛草葉等雜物後，剩番就係金絲燕唾液為主要成分的食用燕窩。
中國人之所以識食燕窩，同明朝鄭和下西洋有關。傳說鄭和嘅遠洋船隊喺海上遇風暴，停靠喺馬來群島一處荒島，由於食物唔夠，船員發現峭壁上有燕子嘅巢窩，於是採摘洗淨，用清水燉煮嚟充飢。點知食咗幾日，船員個個臉色紅潤，中氣十足。於是船隊就採摘一啲帶回中國，由於鄭和係船隊長官，所以後人相信鄭和係中國第一個食燕窩嘅人。不過長官點會亂食嘢吖？我覺得第一個食燕窩嘅人，應該係試過呢種燕窩冇毐先敢送畀長官食嘅勇士，至於係邊個，咁就無從稽考了。
燕窩南瓜湯，係母親節矜貴首選。
皇室御用夠晒矜貴
不過鄭和下完西洋後，帶回國嘅貢品中，就一定有燕窩。之後當然係送上京師，進貢畀皇帝享用，當時嘅皇帝正是明成祖，咁第一個食燕窩嘅皇帝，極有可能就係明成祖嘞。自此以後，燕窩就成為宮廷御膳。明朝《宛署雜記》一書中，就提到南北官府嘅大宴會中，已有用燕窩做嘅菜餚，可見燕窩入饌當時已經流行。直到清代，食燕窩嘅人仍是非富則貴。清代梁章鉅《浪蹟三談》卷五記載：「今京師好廚憶包辦酒席，惟恰外取好燕窩一兩，重用雞湯、火腿湯、麻菰湯三種瀹之，不必再攙他作料，自然名貴無比。」清代文豪兼食家袁枚，亦對燕窩情有獨鍾，並寫下製法：「燕窩貴物，原不輕用。如用之，每碗必須二両，先用天泉水泡之，將銀針挑去黑絲。用嫩雞湯、好火腿湯、新蘑菇三樣滾之，看燕窩變成玉色為度。此物至清，不可以油膩雜之；此物至文，不可以武物串之。今人用雞絲，肉絲，非吃燕窩也。卻徒務其名，往往以三前生燕窩蓋碗面，如白髮數莖，使可一撩不見，空剩粗物滿碗。不得已則蘑菇絲，筍尖絲、鯽魚肚、野雞嫩片尚可用也。」矜貴如此，你話今日係咪要請阿媽食燕窩？再講一次：謹祝天下母親，母親節快樂呀。
蟹粉冬茸燕窩羮，大閘蟹季食就最應景。
