【飲食】有益食材｜番茄真係嚟自番邦？叫西紅柿原來係錯？
紅卜卜。滑溜溜。甜甜哋。酸咪咪。
可以炒。可以煮。可以烤。可以焗。可以煲湯。
可以生食。可以用嚟做醬。仲可以打爛晒佢當汁飲。用途真係超級多。
番茄，含有豐富維他命C，又有茄紅素，可以抗氧化，係人類嘅好朋友嚟架。
水牛芝士伴番茄，係好好味嘅意大利頭盤菜式。
邊度都有番茄
香港人，都好鍾意呢個friend。佢入得屋企，出得餐廳。
睇下！阿媽廚房總有番茄炒蛋、番茄薯仔滾魚湯，可以慰藉心靈。坊間唔少餐廳，更以番茄嚟做主題，好似蕃滿門、紅蕃茄餐廳、番茄師兄之類，餐牌全是各式各樣番茄湯底粉麵，番迷花多眼亂。就算高級餐廳，餐牌入面總唔少得佢嘅影子。法國菜有法式番茄濃湯、焗法式番茄釀肉醬。意大利餐廳嘅水牛芝士番茄，仲有各式意粉同披薩，都會大量用上番茄。日本菜亦有麻醬番茄，蛋包飯上亦唔少得要唧番幾行番茄醬，唔係點似樣。我哋中國人，都好鍾意用番茄做菜式，好似內地嘅西紅柿菜單，一系列就有西紅柿燜土豆、西紅柿蛋花湯、西紅柿燴飯、西紅柿炒雞蛋、西紅柿炒白菜……仲有喺深圳打邊爐，一定食過冰鎮砂糖西紅柿呢味頭盤喇啩！
番茄顧名思義，就係番邦來的茄，唔係中國原產架。
番邦傳入的茄
只不過，番茄叫做西紅柿，原來係錯嘅。
話說番茄係茄科茄屬植物，並非柿樹科柿屬植物，所以係茄唔係柿。至於西紅，即西方來的紅色的，也不夠準確。因為番茄並非只得紅色，也有綠黃橙等色。反而番茄二字，簡而清，訴說身世。番，即係番邦，外來的，不屬於中國本土。因此番茄，就是番邦來的茄。
係呀，據考證，番茄原產於南美洲西部沿岸安第斯（Andens）山區，後來擴散到中美洲，被馬雅人及其他部落栽培，最早嘅栽培記錄至少可以追溯到公元前500年。西班牙傳教士德薩阿貢，就記載咗昔日阿茲特克帝國首都特諾奇蒂特蘭，即今日墨西哥城嘅市場上，就有唔少人售賣各種番茄同番茄製品。之後隨着西班人殖民者嘅足跡，將番茄帶入歐洲。後來更跟住西班牙殖民腳步，傳到加勒比海一帶，甚至遙遠嘅菲律賓，並在16世紀中後期進入中國。
番茄肉碎湯通粉，係唔少香港人嘅comfort food。
食茄會變狼人
16世紀，番茄已經喺歐洲同亞洲落地生根，不過要流行起嚟，並唔係一帆風順。好似歐洲人，最初對番茄勁有戒心。佢哋流傳一個講法，係相傳食咗番茄嘅人會變成狼人，番茄當時甚至俾人叫做狼桃（Wolf Peach），所以最初番茄傳入歐洲，並唔係用嚟食，而係用嚟做觀賞植物或藥用植物。直到18世紀，才有人冒險食番茄，最後冇死，仲打破咗歐洲人對番茄嘅錯誤觀念，到19世紀中，番茄終於登堂入室，成為歐洲人普遍食材。
至於中國，最早記載番茄嘅文獻，係明朝趙函嘅《植品》，書中提到番茄係西洋傳教士喺萬曆年間同向日葵一齊傳入中國嘅外來植物。同代文人王象晉嘅《群芳譜》，亦有以下記載： 「番柿，一名六月柿，莖如蒿，高四五尺，葉如艾，花似榴，一枝結五實或三四實，一數二三十實。縛作架，最堪觀。來自西番，故名。」及至清朝，番茄已愈來愈普遍，乾隆年間小說《綠野仙蹤》中就出現過一句話：「不想他是個西番柿子，中看不中吃的歪貨物。」可見當時番茄已是人人皆知。時至今日，番茄不單人人皆知，我哋中國更有唔少人認為番茄係我國原產，真是個美麗的誤會。幸好，番茄呢個名，簡單而扼要咁，記述咗佢嘅歷史源由同品種，一講大家就明，其實顧名思義就得，使乜寫咁長篇！
