【飲食】民間美食｜雞仔餅係工人姐姐發明？原來係用廚餘剩菜整成？
後生仔，有冇食過呢味嘢？
雞蛋咁大，橢圓一塊。金黃外皮，夾雜疙瘩。咬落去，七分軟熟，三分煙韌。麵粉香、南乳香、豬油香，混合一起，鹹鹹甜甜，甘甘香香，超級惹味。小食嚟嘅啫，唔係頂肚餓嘅，一兩啖就食完。但食過翻尋味，一塊接一塊，完全唔停得口。紅咗好多年架喇，風行嶺南一帶，人人見到，都識叫佢個名。雞仔餅，親切到好似隔籬三姑個仔咁，係廣東不可缺少嘅唐餅小食。
圓碌碌，脹卜卜，雞仔餅望落又真係幾似雞仔。
唐餅四大天王
曾幾何時，佢係唐餅舖四大天王之一。同老婆餅、光酥餅、杏仁餅齊名，當紅嘅程度，就好似當年粵劇界嘅任白波靚，或者而家流行曲界嘅Mirror咁上下。唐餅師傅，個個都識整。南乳、胡椒粉、五香粉，又有冰肉、芝麻、欖仁。溝埋落麵粉，搓成一團團，壓成一塊塊，入焗爐一烘，就係香噴噴嘅出爐雞仔餅。材料多呀，工夫又多，加上現代人覺得冰肉肥膩，唔夠健康，整整下，愈來愈少人整，就算整，都偷減部分材料，以圖符合健康，但就唔夠惹味。好在仲有少數餅家，跟從舊時做法，南乳味足，肯落冰肉，仍然食到舊日唐餅嘅味道。
出爐嘅雞仔餅，金黃亮麗，一排一排咁，引到途人猛吞口水。
婢女小鳳所創
呢塊雞仔餅，唔經唔覺，有超過一百六十年歷史架喇。源於廣州海珠區，傳說係當地一間叫成珠樓嘅食肆主人伍紫垣嘅婢女首創，據說件事起源，有唔同嘅版本。第一個版本，係話說1855年，即係清朝咸豐五年某日，伍紫垣喺屋企款客，撞啱家廚行開咗，於是吩咐婢女小鳳，做啲點心招呼客人。老爺吩咐到，小鳳即刻做，但搵勻廚房都冇乜材料啱用，情急之下，就將廚餘剩菜加梅菜壓成餅塊，烘到香噴噴招待客人。客人一試，居然入口鬆化，十分可口，個個豎起大姆指。老爺見到點心如此受歡迎，索性叫成珠樓點心師傅照辦煮碗，由於係小鳳創作，於是叫做小鳳餅，而廣東人鍾意叫鳳做雞，小鳳小鳳，慢慢變成雞仔雞仔。
好食嘅雞仔餅，食到好香南乳同五香粉味，仲有豬油嘅甘香。
雞仔變咗鳳凰
第二個版本，係話小鳳見廚房冇材料，就去成珠樓借用，將五仁餅餡同梅搓爛，加冰肉鹽糖香料攪勻，用餅皮包好壓扁，放入爐烤到甘香酥甜而成。由於餅形圓圓，十足雞仔，於是隨口叫做雞仔餅。又因為係小鳳所做，而雞鳳又相通，所以又叫小鳳餅。無論邊種講法都好，雞仔餅後來大紅大紫，呢個就不爭事實。上世紀二十年代初，成珠樓嘅雞仔餅就榮獲「展品賽會最優等獎」、1931年又獲得「廣州市國貨展覽會」一等獎，雞仔於是飛上枝頭變鳳凰，一直紅到今日呀。
鯉魚門嘅年香園老餅家，仍然遵照古法製作雞仔餅，風味依然。
