即食麵發明人唔係來自日本？公仔麵先係百分百香港土炮？
世界上沒有一個地方的人，比香港人更熱愛即食麵了。
杯麵碗麵包裝即食麵，不單在家吃在公司吃在飛機也要吃。更誇張的，是幾乎間間茶餐廳都以即食麵作主打，有些餐廳甚至刻意標榜為「出前一丁專門店」，以全店皆吃丁麵作招徠，不單放湯，連炒的撈的食法都有，連元祖日本也自愧不如。只不過，元祖並非來自日本，發明即食麵的人，原來是來自台灣。而香港最先出現的即食麵，也非日本來，而是土炮產。
無論喺屋企煮，定去茶餐廳食，即食麵都一定係主角。
是日本還是台灣
餐蛋麵、沙爹牛肉麵、五香肉丁麵……配乜嘢麵先算正宗？香港人個個都識答，梗係即食麵，想食好啲？加錢轉丁麵啦！丁麵，全名出前一丁，日清食品公司王牌產品，由號稱即食麵之父的安藤百福創立。安藤百福，日語為あんどう ももふく（Andō Momofuku），橫睇掂睇打斜睇，都係百分百日本人啦！殊不知，對一半，他來自台灣。1910年，台灣割讓予日本剛五年，百福在嘉義廳樸仔腳支廳樸仔腳區樸仔腳街出生，父親姓吳，他隨父姓，原名為吳百福。百福出生沒有福，童年並不好過，自幼父母雙亡，由住台南的祖父吳武撫養成人。長大後做過針織、光學機器等生意，可惜在二次大戰期間生意盡毁，心血付之一炬。
1968年出前一丁於日本推出，自此香港有了「丁麵」呢個名詞。
首創雞味即食麵
日本投降後，台灣重光，吳百福選擇當台灣人，歸入中華民國國籍，之後卻冇留在台灣，反而去咗日本發展。當時，美國援助麵粉俾日本，日本政府鼓勵人民做麵包，百福認為麵粉應該用來做麵食，開始自行研究。1958年終於成功研發出一款雞味即食麵，成為即食麵始祖並大受歡迎。同年將商號改名為日清食品公司，1963年更加喺東京證券交易所及大阪證券交易所上市。呢個時候，佢一直用原名，直至1966年才以第三任妻子安藤仁子之姓為姓氏，改名安藤百福，歸化日本籍，放棄台灣人身分。1968年，出前一丁麵於日本推出，並於翌年進入香港市場，即食麵的時代正式展開。
認得呢個公仔，證明你年紀有番咁上下。（網上圖片）
土炮品牌捷足先登
不過，喺出前一丁殺入香港嘅前一年，有一個即食麵品牌捷足先登。呢個品牌，老一軰香港人，人人都識。而即食麵這新事物，更一度以這品牌為代名詞，至今不少港人仍愛以此稱呼即食麵。對了！是公仔麵。公仔麵，是永南食品於1968年推出的新產品，該公司由華南染廠老闆，有紡織業大王之稱的周文軒與及曾任職淘大的王清熙二人共同創立，他們看中了吳百福發明的即食麵正在日本火紅，而華人又好鍾意食麵，覺得呢門生意有得做，於是派王清熙去日本麵廠參觀偷師，返嚟就照辦煮碗，推出港產土炮即食麵。起初呢款即食麵，並未廣泛推出市場，只放在南聯工業大廈的合作社售賣，以測水溫。由於麵嘅包裝有一個公仔嘜頭，大家就叫佢做「公仔麵」，公司亦索性任由呢個名流通，更註冊公仔商標，之後大量生產推出市場，又到徙置區派麵予基層市民，同時又贊助電視台舉辦遊戲節目，「公仔麵」這三個字乃深入民心，成為即食麵代名詞。
公仔麵除咗放湯，仲可以用嚟做撈麵及炒麵，證明港人腦筋真靈活。
留傳後世遍佈全球
1969年，不少餐廳開始大量使用即食麵，為了應付需求，永南食品開始生產大光麵，只有麵餅，沒有包裝及味粉，方便餐廳使用，我哋喺茶記食到嘅即食麵，主要就是大光麵，這就是後來叫丁麵要加錢的原因。土炮公仔麵，由於家傳戶曉，風頭一時無倆，甚至蓋過出前一丁。1985年終於被美國著名食物品牌Beatrice Foods收購大部分股權，1989年又被日本日清株式會社重金收購，土炮元祖成一家，商場爭霸戰終於落幕。而即食麵這新發明，經過約七十年演變，早已成為風靡全世界人民的食物，中國、泰國、印尼、越南、星馬、台灣、韓國、日本……甚至歐美澳紐，都有自家出品的即食麵品牌。而發明人安藤百福，已於2007年1月5日入土為安，留下這影響全球的食物，繼續千秋萬世，屹立不倒。
全世界都有即食麵，你食過邊啲國家嘅出品？
