【小說】灑滿落英的街角（十七）｜一生一心難嗎！
前文提要：若蘭與 Annie 被大秘書針對，本來十分清閑的接待工作，變成上天下地兼出街的全天候走趯員，卻在她要進一步糟質 Annie 時，若蘭捱義氣頂上，而被慕容先生賞識。
「英文唔錯，不過唔係好生活化。」吓，這是彈，還是彈呢！若蘭心想。「份嘢我會叫秘書執埋佢。唔該晒你。」當若蘭放下心頭大石，走向慕容先生辦公室的大門打算離開時，耳邊響起：「幾時回水！」若蘭一時間不明所以，回過神來，才醒起說的應該是修理汽車及乾洗衣服的餘額，只好滿面通紅回頭說：「而家落去過俾你。」接著頭也不回的直接走出辦公室。
在經過秘書室時，若蘭依然保持禮貌的向大秘書點點頭說聲再見。怎知那女子不知什麼原因，竟然說：「你走得啦咩，你肯定你走得啦咩！」若蘭正不知所措，大秘書就收到慕容先生謄改了 minutes 的電郵，並叫她跟進。意思非常明顯，即是若蘭可以離開。
大秘書一時間未想到有什麼方法為難若蘭，只粗暴的說：「走啦！」若蘭也毫不客氣地回以說：「我走啦！你能者多勞！」反正已經交惡，便盡情令自己開心吧。
正在想着一個人吃什麼晚飯時，若蘭就收到手帕交 Helen 的電話，語氣非常低沉，當然一定是與男朋友有關。
「我決定分手嘞！」
「你講真㗎，之前真係未聽過你咁講喎！捨得㗎嗱，成十年啦喎！」
「唔捨得都要，今次嗰個第三者真係太過分，send電郵俾我公司所有人公布自己身份！」
「咁你男朋友點講？」
「佢？咪好似好冤枉咁囉！佢仲叫我鬧翻對方轉頭，但係我已經冇心又冇力！做埋手頭呢兩個客條片，我就放一陣假先！」
「你真係捨得？」
「唔係捨唔捨得，係應該差唔多！我已經唔愛佢，而家如果繼續撐落去，都係為咗啖氣。」
「咁佢呢！」
「佢？你唔使擔心佢喎，而且我諗佢一早已經唔愛我！不過我喺廣告公司做，地位又唔算低，佢覺得有少少威，算係襯得起佢！但係其實我哋係兩個世界嘅人！
佢等老竇死承受遺產，我要努力做到死。我放假都諗緊工作，佢工作時候都係當放假！真係兩個世界嘅人，而且有錢人嘅生活，都唔係咁值得我羨慕！」
若蘭目光呆滯地將叉插入面前的香辣蒜片意粉，捲呀捲，轉成一小口送入口中。思緒不期然回到那年自己丈夫的靈堂前，那天有一個哭得死去活來的女子，聽說是丈夫的同事，就算當時若蘭正經歷喪夫之痛，也留意到這女子三番幾次以凌厲的眼神望向自己！究竟是人心不足，還是男女有別，他自己與Helen，對人，絕對是一心一意的，但別人三心兩意，自己又可以有什麼辦法呢！
（待續）
