【飲食】中環 金鐘｜3間抵食名店：$298歎熟成海鮮、7折嚐星廚手藝、近半價五星酒店晚宴
多了時間留在香港，有否發覺在香港飲飲食食其實都可以好高享受？食大咗個胃，食高咗要求，好難返轉頭。想繼續保持高水準品味，又要照顧吓銀包，就要物色城中優惠。以下三間位於中環和金鐘的餐廳，可以畀你高性價比地風流，要mark低！
1️⃣$298早午餐歎乾式熟成海鮮
中環扶手電梯旁的ThinkWine最近經常搞crossover，每隔個幾兩個月便與城中著名餐廳推出早午餐，價錢只需$298，畀你最少食足五道菜。在中環區，加上咁chill嘅環境，好抵！前排有La Paloma，最新一期，便與同樣位於扶手電梯旁的Percy’s合作。
Percy’s主打乾式熟成海鮮，坐扶手電梯上多一條街，就可以去Percy’s見識店內的乾式熟成櫃。熟成櫃濕度約78%，溫度約2、3度，大部魚鮮熟成3至11日，視乎魚身大小而定，巨型劍魚甚至會熟成兩個月。Percy’s十足海鮮實驗室，除了有乾式熟成野生黃鰭吞拿魚尾，還有蝦肉香腸。
在ThinkWine和Percy’s聯乘的早午餐內，便可以品嚐到Percy’s名物蝦肉香腸及乾式熟成接近兩個月的劍魚肉，單是這兩款菜式已值回票價。另外，如果想配上香檳，ThinkWine更率先全港推出Moet 2013香檳任飲的選擇，每位加$800便可無限暢飲。不想飲香檳，ThinkWine當然還有大量葡萄酒選擇。食完brunch，繼續在ThinkWine直落又得，又或者去Percy’s參加香腸製作班又得，輕鬆消磨週末。
ThinkWine X Percy’s早午餐
地址：中環些利街2-4號LL Tower 2樓ThinkWine
電話：2886 3121
早午餐時間：逢星期六、日 12nn-3pm
價錢：每位$298
~~~~~~~~~~~~~~~~~~~~~~~~~
2️⃣$490天台品嚐米芝蓮星廚手藝
中環H Queen’s的Ecriture貴為二星餐廳，每餐當然所費不菲。而樓上天台的酒吧Plume，自從多月前因疫情禁晚市便開始經營午市時段，而其午市套餐的菜式設計由Ecriture行政總廚Maxime Gilbert操刀，食材亦來源亦與Ecriture一樣，而套餐價錢只是$490起。
午市套餐逢星期二至日提供，$490已經包頭盤、主菜、配菜和甜品。我上星期去捧場，由頭盤到甜品都叫人選擇困難，頭盤有Burrata芝士配車厘茄和鱒魚等，還可加錢揀澳洲和牛他他、Prat-Ar-Coum 生蠔，甚至魚子醬撻。而主菜有燒西班牙八爪魚、藍青口和番茄羅勒扁寬麵選擇，加錢還有原隻烤本地黃油雞和黑椒和牛柳可揀。
配菜亦美味，而甜品就有瑪德蓮蛋糕、法式焦糖布丁和海鹽焦糖蜜餞堅果撻等5款選擇。應該叫多幾個朋友，大家share試多幾款。而且，套餐內每款菜式除了有米芝蓮級水準外，份量亦十足。我當日便食唔晒主菜和甜品，要打包帶回家。所以，找個空閒的平日過來，又或在週末訂定靚位，來個悠悠漫長lunch。
Plume
地址：中環皇后大道中80號H Queen’s 27樓
電話：5200 1683
營業時間：星期二至日 12nn-12mn
~~~~~~~~~~~~~~~~~~~~~~~~~
3️⃣$638細味酒店得獎中菜包香檳
位於金鐘的港麗酒店中菜廳金葉庭一向獲獎無數，主廚尹鐘耀師傅擅於糅合正宗傳統及精緻創新，一直深受老饕們歡迎。為答謝大家愛戴，金葉庭最近推出夏日嚐味晚市套餐，於逢星一至四6pm-10pm提供，價錢只需$638，便可一次過嚐盡尹師傅的招牌菜式，更包一杯巴黎之花香檳，一於去捧場。
夏日嚐味晚市套餐包括招牌燒味、時令海鮮菜式，包括窩巴燒汁帶子和鮮百合露筍炒東星斑球等。窩巴燒汁帶子選用日本特大帶子，肉質幼嫩鮮甜，配上每一次均以新油炸的香脆窩巴，與帶子形成兩種截然不同的口感，卻又相互配合。鮮百合露筍炒東星斑球以新鮮星斑入饌，鮮甜味美，亦能感受師傅控制火候的功力。
另外，脆皮龜苓膏為金葉庭的特色甜點，龜苓膏以龜板自家熬製，龜苓膏外層塗上薄薄的脆漿才炸，炸得金黃酥脆，然後沾上黃豆粉，並輔以甜甜的菠蘿粒及糖漿作配料，中和了龜苓膏的甘味。六百多元可以在晚市品嚐五星酒店名廚中菜，要好好把握機會，快快訂枱啦！
金葉庭
地址：金鐘金鐘道88號太古廣場港麗酒店大堂低座
電話：2822 8870
營業時間：星期一至六 11:30am-3pm、5:30pm-10pm；星期日 11am-3pm、5:30pn-10pm
