張德蘭13歲組女團始組「四朵金花」 自認最歎成員當年只係做一樣嘢
發佈時間：11:00 2023-06-23
現年62歲的張德蘭早在60年代便以童星身份加入TVB，1973年張德蘭年僅13歲，便與沈殿霞、汪明荃及王愛明組成香港女團始組「四朵金花」爆紅，其後演繹過的經典劇集歌曲多不勝數。早前張德蘭在鄭國江演唱會、TVB《萬眾同心公益金》登場，依然中氣十足，現在充滿貴氣。最近張德蘭接受港台節目《香江暖流：我們的VIP》訪問，大談昔日「四朵金花」往事。
【相關閱讀】：萬眾同心公益金2023丨62歲張德蘭演出中氣十足！轉行做中醫多年養顏有術依然貴氣
【點擊睇張德蘭講四朵金花】：
張德蘭小時侯參加童裝公司時裝騷的歌唱比賽成為童星，在家中年紀最小、排行第10的她透露：「哥哥姐姐當我公仔咁，首先係去嗰間公司做模特兒，有一年母親節佢哋搞兒童歌唱比賽，阿哥家姐買咗蕭芳芳一隻黑膠碟《媽媽好》，家姐日日都播畀我聽。」雖然張德蘭當時未學音樂，又不懂普通話，卻成功奪冠，後來張德蘭才去學跳芭蕾舞，更獲得機會去拍電影。不過張德蘭入影圈期間適逢粵語片式微，後來轉投TVB。雖然生活忙碌，但張德蘭卻表示好開心：「嗰時去遊樂場唱歌，後來有歌廳，嗰陣個個都好錫我，知我冇時間返學，仲喺後台安排時間幫我私人補習。」
汪明荃親自勾冷背心
張德蘭提到在《歡樂今宵》當時組「四朵金花」，成功度過最尷尬的成長階段：「好感恩，有姐姐帶住，好多學習機會，佢哋見我唔開心又會傾吓偈。」張德蘭還笑說她是「四朵金花」中最歎的一個：「因為我最細，唱咩歌、着咩衫、舞步啲姐姐做晒，揀歌、跳舞就係肥姐（沈殿霞）、Liza姐（汪明荃），衫嘅設計就到明明（王愛明），我就只係做一樣，就係聽話！」
不過張德蘭表示當時也學習到不少事情：「《歡樂今宵》每個星期都要諗唔到嘅歌，好多唔同形象、唔同演繹，又要和音，一個組合要分部，係一個幾好嘅訓練。」張德蘭透露當年「四朵金花」感情極好：「雖然無綫幫我哋做衫，有時做完我哋會加工。」她還提到《四朵金花》的唱片封套：「黃色晚裝上面膠片都係自己整；我哋曾經每人有一件冷背心，係Liza姐幫我哋勾出嚟，好型㗎！」
親解別名「四個番瓜」
當時「四朵金花」曾有別名「四個番瓜」，原來是當時過場過長，主持爆肚將「四朵金花」改成「四個番瓜」：「如果真係咁（叫『四個番瓜』），我哋四個都唔放過佢。」至於「四朵金花」的名字，原來是代表名貴、漂亮：「我哋四個都好鍾意，另一個名（番瓜）我哋會嬲，唔知點解講一次觀眾就記得，可能個名太好笑。」主持問到肥姐在世時，「四朵金花」曾否想過開騷，張德蘭指：「我哋成立得太早，嗰時未興女團，冇呢個機會。同埋嗰陣都冇紅館、伊館，最叻都係利舞台，或者浸會大學會堂，同埋嗰陣表演形式都係一個個，如果個團體押後多幾廿年，我哋一定會有演唱會。」
張德蘭與丈夫楊偉誠（Frankie）結婚多年依然恩愛，提到當時張德蘭結婚離開娛圈，她表示：「我思想好傳統，覺得男主外女主內，同埋我哋年代結婚就會淡落嚟。」她表示結婚後是另一個階段，以家庭為主，還笑說做主婦亦要不停進修。主持提到當時張德蘭是大名明，丈夫只是小職員，張德蘭坦言當時兩人是在TVB認識，還表示母親當時亦有提點她要「睇清楚」。
張德蘭後來轉行做中醫，她直指讀中醫課程後，連人生觀亦有改變：「最緊要保持開心，唔開心會積咗好多唔舒服，影響身體。同埋真係要郁，氣行則血行，就算唔郁多啲，自己按摩下都要做。」張德蘭透露當時讀完課程後，也有想過是否開醫館：「不過由早到晚，香港人又夜收工，以我想以家庭為主嘅目標好似有啲違背，衡量後就發揮係生活、朋友當中。」
【其他閱讀】：
盤點《歡樂今宵》元老！91歲潘迪華保持優雅計劃出書 《情花開》原唱移民再回流神隱多年
《歡樂今宵》元老杜平結婚60周年宴群星到賀 契女翁虹盛裝赴會貴氣十足
《星島申訴王》100集誕生之我最喜愛影片票選，由6月16日至6月30日，玩遊戲贏取總值超過10萬豐富禮品！
立刻點擊投票👉🏻https://tinyurl.com/38dfzwtv
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
