ViuTV主持溫穎琦鬧爆遭狂迷迫埋牆抽水 靚女TVB主播林婷婷亦曾遭同一毒手
發佈時間：20:30 2023-08-04
有線《一線搜查》主播丘靜雯、無綫主播林婷婷日前相繼被同一位瘋狂追星族疑似抽水，丘靜雯更險遭該男子觸碰胸部，該男子隨即被全網鬧爆。今日再有ViuTV娛樂主播溫穎琦在IG貼相，並撰寫長文鬧爆該名粉絲抽水，直指當時已經大聲開口鬧爆：「請你唔好再搭住我膊頭唔該！」但對方仍撞她埋牆影相！
【相關閱讀】：「最靚主播」丘靜雯被集郵險遭碰胸 男粉絲多次被鬧抽水搭女星膊頭影相
【點擊睇溫穎琦疑遭抽水】：
溫穎琦在IG透露事件發生於上月16日《全民造星V》開場及中場時間，溫穎琦指：「呢位第一次見嘅男子，當我答應合照企好影相前一刻，佢突然搭隻手喺我右邊膊頭，再突然轉為搭左邊將我攬埋佢度，我要一直鬥力拉開距離，嗰幾張相其實只係五秒內嘅事。」隨後溫穎琦急步離開，對方卻一直尾隨。
至中場時間溫穎琦離場買食物，該瘋狂追星族亦跟隨他入升降機，出𨋢後她與另一粉絲合照，該男子再次上前要求合照：「我未答應，佢已經又再搭落我膊頭，我縮開同時好大聲話：『請你唔好再搭住我膊頭唔該！』聲量係坐喺咖啡店嘅其他人都望咗過嚟，雖然alert到其他人感覺安全咗，但嗰刻我已經唔想再影，打算向前行。我一行，佢就用身體撞咗我埋牆影相，我再喝佢：『唔好推我埋牆呀！』然後佢轉身跑走咗。」
溫穎琦還指該男子還在IG肆無忌憚的tag她：「我就知道，有時點講點鬧都係冇意思的，我哋只能夠避開。」溫穎琦呼籲女生遇同穎似情況要保護自己：「不論程度輕重，只要感覺唔安全、唔舒服都唔需要忍，大聲講出嚟，首先要畀附近嘅人知道有呢件事發生緊先，起碼對方唔會得寸進尺，然後溫附近嘅人幫手，香港仲有好多熱心嘅人㗎。」
【點擊睇之前遭殃女星】：
【溫穎琦IG全文】：
【呢件事係有必要講嘅】
分享埋俾你身邊嘅女仔睇
希望大家遇到都可以有所防範
事情發生喺《造星》總決賽開場前及中場時間。
其實平時喺活動現場合照嘅都已經見慣見熟，大家都係有禮貌又有講有笑，一般都係感覺安全而友善的。
而呢位第一次見嘅男子，當我答應合照企好影相前一刻，佢突然搭隻手喺我右邊膊頭，再突然轉為搭左邊將我攬埋佢度，我要一直鬥力拉開距離，嗰幾張相其實只係五秒內嘅事。之後我急步離開，佢一直尾隨咗我一段路，我見勢色唔對就同佢講：「我要做嘢先，完show再見你哋啦byebye。」
直到中場左右，我肚餓離開場館買嘢食，佢喺場外尾隨我入𨋢，我一直留意住佢，但𨋢入面有其他人所以我冇咁擔心，落到G/F我都有等佢出咗𨋢先。
到我出𨋢，同另一位男粉絲合照後，呢位男子再次上前要求合照。我未答應，佢已經又再搭落我膊頭，我縮開同時好大聲話： 「請你唔好再搭住我膊頭唔該！」聲量係坐喺starbucks嘅其他人都望咗過嚟，雖然alert到其他人感覺安全咗，但嗰刻我已經唔想再影，打算向前行。我一行，佢就用身體撞咗我埋牆影相，我再喝佢：「唔好推我埋牆呀！」然後佢轉身跑走咗。(佢有張out fo嘅相就係跑走前影)
當時好嬲，我唔認為做幕前工作，對陌生人嘅任何要求、行為舉動都要笑住接受先等於友善，被觸碰身體都要大方唔出聲？我個身體唔係屬於你的。但當時有工作在身只能喺電話同朋友講，平復心情入返場館，等到工作結束後先同相熟同行呻咗幾句。
(圖二)當晚喺TG Group，收到張我認得係佢影嘅相，我知道send出嚟嗰位唔係當事人，想透過佢揾返嗰位男子，希望同佢講多次唔好再咁做。
第二日，當事人喺ig肆無忌憚咁將兩張相tag俾我🙂我就知道，有時點講點鬧都係冇意思的，我哋只能夠避開。
所以，女仔遇到呢啲事要識得保護自己，不論程度輕重，只要感覺唔安全、唔舒服都唔需要忍，大聲講出嚟，首先要畀附近嘅人知道有呢件事發生緊先，起碼對方唔會得寸進尺，然後揾附近嘅人幫手，香港仲有好多熱心嘅人㗎。
P.S.姐姐可是捉過幾個人上差館的喔🙂
P.S.預計又會有啲假account留言「以為自己係邊個，自己著到點點點」blah blah blah……無論係邊個，人哋著成點，你都冇權掂人哋身體，bye。
【其他文章】：
《不Chok》女想拍劇做賤女人 32B溫穎琦心儀Alton拍牀戲𦧲飯應
5位女神級主播齊貼20歲舊照青春可愛 呢個小花10年前已晒長腿勁吸睛
TVB新聞之花林婷婷首次北上出差着短裙即出事 遇「熱情招待」美腿慘被蹂躪
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
