星8卦｜「排骨」好勝愛爭仔扮死以為贏到筍盤一齊還債

更新時間：11:30 2023-09-05
發佈時間：11:30 2023-09-05

而家啲女仔真係好進取，「排骨」鬥靚出身，鬥得過癮，連男人都要鬥搶，所以咁多年佢都無乜女性朋友。好似鬥靚期間佢睇中另一位姐姐嘅男人，佢開初係同人扮Friend，成日玩三人行，有啲女人真係生成狐狸命，係男人都會對佢產生興趣。未鬥完靚，人哋嘅男友已經轉會做咗佢嘅人，轉到人人都藐話呢對正式狗男女，但慘得過「排骨」一啲都唔知醜，仲要個男人車出車入做觀音兵。

「排骨」慣咗同期有兩個男友，有時仲要三個，而且叻到彼此唔知大家嘅存在，因為每個男人嘅功能都唔同，方便自己呼來喚去。最近佢終於停咗落嚟，因為佢呢個「目標」之前同好多圈中靚過自己、叻過自己嘅拍過拖，唔知點解自己嘅姣功都唔係好湊效，唯有一次出招扮死，佢都好博㗎，如果「目標」唔係及時出現，佢隨時要等第二世投胎至有機會再追過佢想要嘅男人。

不過「目標」係表面風光，聞說呢幾年都唔係好掂，所以佢都要默默繼續捱，幫吓手還債。呢個故事就係教訓大家，有乜好爭呢，爭番嚟可能都係另一個籮底橙！