金馬獎60丨余香凝爭影后喜極而泣林保怡角逐男配角開心獲認同

更新時間：20:30 2023-10-03
發佈時間：20:30 2023-10-03

台灣「第60屆金馬獎頒獎典禮」將於11月25日在國父紀念館舉行，今日（3日）大會公布入圍名單，當中有三部香港電影《白日之下》、《年少日記》、《填詞L》入圍爭獎，其中由林保怡、余香凝（Jennifer）、梁雍婷演出的《白日之下》，一共獲得五項提名，非常厲害，一眾入圍演員開心分享感受。

【相關閱讀】：金馬獎60丨林保怡憑《白日之下》首爭最佳男配角同片余香凝角逐影后

【點擊睇金馬獎各項入圍演員心情】：

《白日之下》的女主角余香凝爭奪影后，而林保怡、梁雍婷分別入圍最佳男、女配角，電影亦有份角逐最佳美術設計及最佳造型設計。剛誕下第二胎正在坐月的余香凝，首次提名金馬獎「最佳女主角」，她透過錄音分享首度提名金馬影后的心情：「好開心好開心呀！我個人未平復到呀！好激動，因為仲坐緊月，所以自己第一年可以咁樣坐定定睇住個金馬獎入圍名單直播，其實阿女唔知我發生緊咩事，但突然之間見到我地咁激動，佢走過嚟錫我塊面，十大最驚喜，最開心嘅一個moment，同埋有媽咪同個女喺度同我分享。亦都好開心保怡哥、梁雍婷同埋美術指導可以入圍，因為呢一齣戲我真係好鍾意好鍾意嘅一齣電影，香港仲未上映，希望可以帶動觀眾可以多多入場支持。我都知坐月唔可以喊，忍唔住激動到喊，我會努力坐完月去收身，希望11月去出席金馬獎會靚啲，唔會咁肥咁腫。」

林保怡憑《白日之下》獲提名「最佳男配角」，他透過錄音分享感受：「大家好！我係林保怡，今次入圍金馬開心啦！當然開心啦！都演咗咁多年戲，雖然未得獎，已經有一啲認同，其實我自己近排忙緊運動、跑步，Keep住個身體。之前已拍咗四部戲，我知道《白日之下》好似喺11月出街，大家出嚟支持一下我哋嘅創作。今次獲提名我係有少少意外，我哋套戲嘅對手都好強，佢哋嘅演技都好好，今次提名真係好開心，多謝！多謝大家！」

梁雍婷角逐「最佳女配角」，她表示：「首先多謝金馬獎評審嘅肯定，特別想多謝監製爾冬陞、導演簡君晋、編劇Iris同阿fung、《白日之下》所有演員及幕後整個團隊一齊共同創作咗一套別具意義嘅電影，希望到時公映嘅時候觀眾會入場支持《白日之下》。特別想多謝飾演小明嘅周漢寧，多謝佢係拍攝過程中同我一齊行呢段journey。最後再一次恭喜Jennifer、保怡、Albert 、陳巧倩、謝靄琳。期待去台灣食素鐵路便當！」

【點擊睇《填詞L》、《年少日記》劇照】：

由黃鐦監製，黃綺琳執導兼編劇之新片《填詞L》榮獲金馬獎兩項提名，包括女主角鍾雪瑩提名「最佳女主角」及黃綺琳提名「最佳改編劇本」，二人均首度入圍該獎項，透過文字答謝大家的祝賀。鍾雪瑩表示：「謝謝大會，謝謝《填詞L》的所有工作人員守望相助，謝謝廣東歌。黃鐦黃綺琳剛剛約了我今晚食燒肉，就像當初叫我一起拍電影如此即興又認真，我會多吃幾塊！謝謝！」黃綺琳則表示：「第二次參加金馬獎，感覺比第一次還緊張。上次最高興是《金都》朱栢康提名最佳男主角，今次《填詞L》入圍兩個獎項，非常開心尤其是鍾雪瑩提名最佳女主角，超級幸運有她，一個超級會演戲的填詞人，一個超級會填詞的最佳女主角！恭喜！趕緊慶祝一下！」

另一部《年少日記》入圍「最佳劇情片」、「最佳新導演」、「最佳男配角」，身為該片監製的爾冬陞有感而發：「有老懷安慰的感覺。」而《年少日記》導演卓亦謙角逐「最佳新導演」，他表示：「第一次拍電影之前，我的本業是寫劇本的，一直很喜歡說故事，所以得到劇本上的肯定，對我來說有很大的意義，彷彿有人拍拍我的肩膀說：要繼續做自己喜歡的事情喔。」入圍「最佳男配角」的黃梓樂表示：「首先好多謝導演卓亦謙哥哥畀機會我，第一次睇劇本嘅時候已經睇到喊，一套好打動人心嘅電影，而且我係第一次收到全套戲嘅劇本，好多謝導演嘅信任，拍嘅時候冇諗過入圍定唔入圍，只希望自己盡力去做，希望大家都可以支持《年少日記》。」