獨家丨林家棟承認愛做幕後滿腦大計 入行35年仍享受拍戲被導演「虐待」
發佈時間：07:00 2023-10-27
由鄭保瑞監製、李子俊執導、林家棟主演的《第八個嫌疑人》，以1995年番禺搶劫運鈔車案作藍本。家棟首演公安要講普通話有難度，而瑞導和李導就大讚家棟充滿創造力，加上超強投入度，所以頻頻合作。有傳入行35年的家棟將返娘家TVB執掌製作部，擔任電影監製13年的他承認做行政工作有經驗，亦對幕後工作有興趣，目前正為首次執導做準備，恭喜定林導演先。採訪：杜杜 攝影：羅安強 髮型:梁佇鳴Alex@Salon Nova（家棟）化妝:張楊蕊而[email protected]. Factory （家棟）場地:1881 Heritage
李導對搶劫運鈔車案好有興趣，「究竟呢兩兄弟係21年嘅逃亡生活係點？最想講人性嘅刻畫，着墨喺人物入面。」家棟認為故事容易引起內地觀眾共鳴，「喺90年代屬於世紀大案，當時唔見1500萬係好重要嘅事，睇見好多評論話『細個喺呢度長大，爸爸媽媽帶我嚟睇過呢啲地方』，對觀眾，尤其係新一代會好奇。」
愛家棟富創造力兼投入
戲中家棟演公安「王守月」，花了21年追捕兩名主犯，他笑言要演跨度大角色並非最難，「古裝都係咁拍，哈哈！」反而首度做公安，花了不少時間做準備，「導演帶我哋去佛山公安部門參觀，畀咗啲video我哋睇，開會都容許我哋聽，睇到佢哋處理都好人性化。我有問可唔可以帶我去睇破案呢？佢哋話『我哋要保護埋你哋，唔好嘞』哈哈！」全片主要講普通話，他就視為突破，更笑指：「係舒服地演出，但艱難地接收，哈哈！當大鵬講廣東話，同我講普通話時，大家都唔……（無奈樣）哈哈！大家都專業，我勉強應付到啦！」
瑞導今年另外兩套作品《斷網》及《命案》、李導首執導的《狂獸》亦是跟家棟合作，後者透露今次只有概念，劇本未寫已搵家棟，追問「鍾愛」家棟原因？3人即狂笑。瑞導解釋：「當然家棟嘅演技唔使懷疑，做導演就會咁樣去睇，佢仲有咩可以畀我掘，有乜嘢擺落佢度，喺呢個角色加呢個演員有咩化學作用，不其然諗到不如搵家棟囉！」李導更誇張，「第一次睇完周汶儒寫嘅劇本咁紥實，第一個畫面就諗起家棟，佢有好大創造力，大家好似拋波咁拋嚟拋去，我哋合作模式係咁，會有驚喜。」拍攝時家棟就算傷腳，也連踩18個鐘拍攝，令兩位導演對他多一份愛，瑞導直言，「我就感受好多，哈哈！點樣都肯同你再嚟，做導演最開心遇到演員令到現場氣氛好，當個演員都用咁嘅態度面對個戲，其他人就唔會放鬆。」李導認同說：「冇佢嘅戲都會坐喺我哋側邊。」家棟搞笑解畫：「我改英文名叫阿Ｍon，你係睇住個Ｍon啫！」
家棟有演員夢仍未達成
電影在內地上映，成為「2023年一周票房冠軍」，而主演的大鵬更奪得《第25屆上海國際電影節金爵獎》最佳男演員，3人希望好成績能延續到香港，瑞導更希望這次成功，證明香港製作人能駕馭到拍純內地題材，甚至是未來發展方向，「我哋可以去第二啲國家，唔只內地，拍唔同地方嘅故事。」家棟補充：「全宇宙！」瑞導坦言單是衝出亞洲已不錯，「去馬來西亞、新加坡、台灣、越南拍戲，都可以拍到當地嘅味道，至少係一個方向，當然我自己做唔到，但係子俊今次做到嘞！」
最近傳出家棟將返娘家TVB執掌製作部，他出席首映禮時，未有明確否認，其實他對幕後工作一直有興趣，由2010年監製《打擂台》開始，已有3套作品面世。他坦認很享受同時兼顧監製和演員，時間分配不會排優先序，「邊樣埋嚟咪邊樣先囉！幕後崗位真係花多好多時間，要由創作開始，幕前真係比較舒服，時間容許我都鍾意演出，我都未完晒自己啲夢。」問到係咩夢？他即拋波給兩位導演，「睇佢哋幾時再虐待吓我先啦，哈哈！」明顯他好享受這種「虐待」方式，瑞導都忍不住笑他，「你唔使聽佢講！」家棟每次開工都好開心，「唔知點解每次去到現場見到啲crew、機器，會好興奮！」做監製和演員還未夠喉的家棟，正為首次執導做準備，「真係有諗，但係劇本好花時間，我都希望盡量能夠有個好嘅劇本，令大家都接受，有個新角度。」至於會否自導自演？他就有保留，「嗱！呢個係現實嚟，要睇投資方點睇，哈哈！我主觀上未必想自己埋位，因為真係有盲點，但呢刻唔諗住，諗咗個劇本先。」
《星島頭條》新網站有更多精彩內容：http://www.stheadline.com/
