獨家丨陳凱詠唔得閒計數未識驚 自組公司捧自己父母好擔心
發佈時間：08:00 2023-10-27
因為跟環球唱片理念唔同，29歲陳凱詠（Jace）被掟入雪櫃年多，上月約滿「重生」，本月中即以獨立歌手身份推出EP《HATCHING》，5首作品均由她填詞及作曲。和舊東家及新晉導演陳健朗同步分開，Jace坦言𠵱家要勇往直前，並強調身邊有好多人力撐，「呢刻絕對唔係單打獨鬥。」採訪：方騫平 攝影：羅安強 髮型：Kenki @ W Workshop 化妝：Echo Makeup 服裝：modamoya 場地：Sumac Restaurant and Lounge @sumacrestauranthk
陳凱詠由環球唱片娛樂主播變身歌手5年，曾推出多首Hit歌如《天生二品》、《隔離》和《收聲多謝》等，加上跳得又唱得，成為樂壇「小天后」受公司力捧，不過自去年4月推出單曲《Long D》後，便被唱片公司雪藏。Jace否認因公司接Job價錢，跟她要求落差太大而反目，她形容好似一個人轉工咁，是緣份及機遇，離開一間公司唔代表間公司唔好。
雪藏經歷急速成長
新碟收錄5首作品，靈感取自Jace的「雪藏假期」遊歷，屬最直接感受，完全冇考量商業成份，所以當中有加入西班牙文、英文等：「由憂傷嘅《掰掰歌》到《各行各路》為自己打氣，然後去到匿埋《練功》增值；《見聞覺知》係寫已調整嘅自己，到最後嘅《時機已到》係講起起跌跌後要勇往直前，寄語之後會有更強勢嘅事發生，所以專輯取名《HATCHING》(孵化中)。」
Jace坦言由簽大公司轉做獨立歌手，要兼顧好多瑣碎事，支出亦非常多：「呢筆錢係之前畀心機努力工作，慳埋慳埋嘅積蓄，𠵱家仲未得閒計數，所以未驚住，數字嘅嘢隨遇而安，未見底都堅持做有質素嘅作品。但你問，我梗係驚啦，因為乜都係使自己錢，可以好快用晒，父母都會擔心我，但就好支持我，好彩有啲儲備金畀我任性。」今次經歷促使她成長及增強自信，最重要學到獨立：「唔信自己只會浪費咗大家對我嘅期望，有信念就會做得到。𠵱家變得好有使命感，要勇往直前冇得膽小。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
