賴慰玲喊住讚暖男黎諾懿嚇親:咩事呀大佬首次全裸拍《婚後事》公開拍攝血淚史丨獨家

更新時間：07:00 2024-03-13 HKT
發佈時間：07:00 2024-03-13 HKT

黎諾懿和賴慰玲（Winki）在話題劇《婚後事》中首合作，兩人由情侶演到夫妻，有連場電視尺度邊緣的「愛情動作戲」，暫時最激一幕是男方露股，再跟裸背Winki在浴缸談情，此幕更令入行22年的諾懿榮登「TVB股王」。人妻兼媽媽Winki大讚諾懿係暖男時更感動到喊，嚇到男方唔知點算，「嘩！咩事呀大佬！」採訪：杜杜攝影：譚志光

諾懿和Winki鴛鴦戲水一幕好浪漫，兩人笑言拍攝過程相當搞笑。男方睇劇本時已知要露股，監製事前亦有問他：「使唔使操個股，我話點操㗎？！」而太太李潔瑩亦不太滿意其身形，「佢唔介意我除衫，但係可以fit啲，佢見過我最fit時候，影婚紗相，連人魚線、籮抽都起晒𦟌，嗰日個『籮柚』，以依家歲數（43歲）可以啦！」Winki提議他，「到時夾實啲就得！」諾懿笑住拒絕：「好難夾實講對白，未識咁高技術！」問到拍攝時有否清場？諾懿笑言：「拍AV咩？做乜清場，劇組梳頭化妝PA都係女仔，冇清場。」監製林肯本已安排肉色褲給男方打底或黐膠紙，但他放棄，「監製話key返個『籮柚』，又話黐前面，咪好痛？我話唔使咁煩，有塊磨砂玻璃，拍嘅時候除咗條肉色褲，佢話你唔好突然走出嚟，哈哈！」Winki亦要求諾懿，「唔好擰轉身，除褲話我知，我唔望！」

諾懿露股，Winki大露背，挑戰電視尺度。

諾懿10年前的結婚相，腹肌操得好靚。

全裸拍攝的Winki和諾懿，要互幫對方防走光。

Winki無奈全裸拍攝

Winki以「出世以來最激一次」形容浴缸談情戲，收到劇本有問監製是否有需要，「點解要喺浴缸傾偈，喺牀傾或者着返衫唔得咩？！」跟監製討論後，明白兩人肉帛相見更能講出心底話，「好怕呢啲性感嘢，知道要拍好恐懼。」不過她慶幸對手是諾懿，「拍攝個幾月，建立咗好強嘅信任，唔會覺得尷尬。」拍攝當日她嚴陣以待，但打底時卻出問題，「黐咗幾卷膠紙，以為準備得好好，但佢哋驚我凍親，用好熱嘅水，一落水膠紙就溶，上嚟再黐，場地時間又夠嘞！其實諾懿全裸，我都係全裸㗎！我搣走晒膠紙用手掩住，亦都有啲泡幫我遮吓。」她在恐懼下拍這場戲，好彩諾懿幫她防走光，「如果第2個我真係唔夠膽，對住你我係完全冇尷尬。」

在水溫超過40度下攬錫，這場鴛鴦浴拍得非常辛苦。

劇中諾懿和Winki有大量情緒波動戲份。

Winki拖諾懿手入戲

Winki跟諾懿首度合作已互相信任，全因兩人試過深度對話更了解對方，「我問佢以前係咪成日媾女？佢話唔係！仲講咗少少歷史畀我聽，望住佢開始有感受，條友成日扮壞人，其實都係小男人！咩人先會扮壞人呢？！真正嘅好人，我開始搵到佢呢面，其實佢係暖男，好細心，拍攝過程照顧咗我好多。」Winki講到眼濕濕，「嘩！有啲感動𠻹！越嚟越欣賞呢個人，可以喺呢個過程奉獻自己畀佢。」Winki越講越激動，喊到要離場搵紙巾，諾懿都嚇親，「嘩！咩事呀大佬！睇吓佢幾咁愛。」諾懿亦好信任Winki，最難忘對方入戲方式，「有日拍佢發癲、情緒崩潰戲，佢突然埋嚟話『可唔可以拖住我』，好少有人咁樣，跟住佢自己培養感情，平時我都會嘻嘻哈哈，嗰陣唔敢嘞！」

Winki要靠拖住諾懿的手來投入角色。

Winki讚諾懿期間，突然眼都紅晒。

Winki最後忍唔住喊，要攞紙巾抹眼淚。

諾懿忙籌備結婚周年

兩人都大讚另一半好支持他們，諾懿太太還會陪他一齊煲劇，「同太太睇多數會用多1倍時間，佢會pause問好多問題。」黎太亦好放心老公拍感情戲，「佢唔會覺得我拍一套就鍾意一個人，會覺得好得意𠻹，少見嘛！」就算這次有大量激情場口，一樣冇投訴，「佢會話『唔使錫返老婆㗎』，錫返啖咪冇嘢囉！」Winki的舞台劇演員老公梁子峰，同樣不擔心，「佢嘅金句係『你係咩人就係咩人，如果係亂嚟嘅人，唔需要有對手，做任何工作都可以走咗去』佢係智者嚟，而同我個history都幾好，會有一定信任。」兩人拍完劇，均有審視自身婚姻關係，認同平淡是福。Winki說：「太激烈嘅感情、婚姻好攰，留返喺戲劇世界幾好，好慶幸有簡單幸福嘅婚姻！」諾懿亦相當認同，仲自爆生了兩個囝囝後，經常被太太投訴冇時間過二人世界，為將太太放返首位，努力搞緊大project，「今年結婚10周年，老婆問有咩搞？佢話『唔要一家係你同我呀！』我諗緊㗎嘞，好上心，你見我冇接公司任何project，搞掂呢單先，呢個勁過大騷，Live騷都搞得掂，呢個搞唔掂，我要絕跡嘞！哈哈！」