林子博為19歲大女鋪路升讀大學 移居英國3年溝通仍有好大問題丨獨家
發佈時間：08:00 2024-04-19
3手前，單親爸爸林子博帶子女移民英國曼城，最近趁大女林詠渝19歲生日舉家到卡迪夫、布里斯托、巴斯及倫敦走一轉，主要參觀布里斯托大學區，為囡囡兩年後升讀大學做準備，子博坦言在人生路不熟的地方生活一定有唔少挫折，但只要腦海浮現子女戴四方帽畫面，就會充滿力量，所有難關必定捱得過。採訪：方騫平
林子博愛女詠渝最愛倫敦，暖男爸爸便精心安排囡囡在倫敦慶生：「我哋先去布里斯托，因為囡囡要認識一位讀電影製作嘅新朋友仔，等佢預先搜集好相關升學資料，順道參觀布里斯托大學。」
子博期望又大一歲嘅詠渝能順利升讀鍾意嘅科目，仲會畀心機讀書及更加融入英國文化，識多啲人：「佢仍然只留意港、台、韓資訊，明顯未夠投入𠵱度嘅生活，但明白嘅，佢咁大過先過嚟，重新適應及建立社交圈係要慢慢嚟，而且母語唔係英文，每逢做功課及考試都會面對好大嘅挑戰，我會安慰佢『係咪頂唔順啫？只要搵到興趣及方向，唔一定要大學畢業嘅』，佢反而比我更堅持，話『過得嚟，點會唔讀埋大學呢？』」
陪玩兼做埋司機工人
子博承認獨力在外地照顧兩名子女起居飲食頗辛苦，笑言除陪太子讀書、陪玩、做埋司機車出車入外，工人又係佢，要煮飯洗衫及做家務，甚至家居維修等。不過，最大困難係生活上的溝通都有問題：「𠵱家仲未可以用英文完全表達內心諗法，但我冇諗過回流，喺困難時會溫提自己，當日赴英定居嘅初心係乜？希望帶住兩個子女去留學，見識一吓呢個世界，接觸唔同嘅文化，至少期望佢哋能大學畢業，再憧憬將來同佢哋影大學畢業相，我會耐心等待回報，堅持咬緊牙關，冇嘢解決唔到，所以唔會諗頂唔順要離開。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
